சத்தியமனை SATHIAMANAI

இனிய தமிழர் திருநாள்! தமிழ்ப்புத்தாண்டு!! பொங்கல்!!! நல்வாழ்த்துகள்!!!!

2012-01-15T04:56:00.000-08:00

எல்லோருக்கும் எங்களின் தைத்திருநாள் தைப்பொங்கல் வாழ்த்துக்கள்

இனிய தமிழர் திருநாள்! தமிழ்ப்புத்தாண்டு!! பொங்கல்!!! நல்வாழ்த்துகள்!!!!

தோழர் கே.ஏ. சுப்பிரமணியத்தின் 22வது நினைவு தினக்கூட்டம் : தோழர் செந்திவேல் ஆற்றிய நினைவுச்சொற்பொழிவு

2011-12-13T16:31:00.000-08:00

கடந்த 27.11.2011 அன்று தோழர் கே.ஏ. சுப்பிரமணியத்தின் 22வது நினைவு தினக்கூட்டம் கொழும்பில் நடைபெற்றது. வெள்ளவத்தை தேசிய கலை இலக்கியப பேரவையின் கைலாசபதி கேட்போர் கூடத்தில் சி.சிவசேகரம் தலைமையில் நடந்த மேற்படி கூட்டத்தில் புதிய-ஜனநாயக மாக்சிச-லெனினிசக் கட்சியின் பொதுச் செயலாளர் சி.கா. செந்திவேல் ஆற்றிய நினைவுச் சொற்பொழிவின் சுருக்கம் இங்கே தரப்படுகிறது.

பொதுவுடைமை இயக்கமானது மாக்சியத்தை அடிப்படைக் கருத்தியலாகவும் உலகக் கண்ணோட்டமாகவும் கொண்டே உலகம் பூராவும் பற்றிப் பரவி வந்திருக்கிறது. தொழிலாளர்கள் விவசாயிகள் மற்றும் உழைக்கும் மக்களின்; தலைமையிலான போராட்டத்தினால் சமூக மாற்றத்தை வென்றெடுத்து நிலைநிறுத்த வேண்டும் என்பதை மாக்சிசமும் பொதுவுடைமை இயக்கமும் வெளிப்படையாகவே பிரகடனம் செய்து வந்துள்ளது. அந்த வகையில் பழமைவாதமும் மரபு பேணலும் சடங்கு சம்பிரதாயங்களும் இறுக்கமுடன் இருந்து வரும் நமது தமிழ்ச் சூழலில் ஒருவர் மாக்சிச உலகக் கண்ணோட்டத்தை உள்வாங்கிப் பொதுவுடைமைவாதியாகிக் கொள்வது இலகுவான ஒன்றாக இருப்பதில்லை. அத்தகைய சூழலில் துணிவான மீறல்களும் கடுமையான எதிர்நீச்சல்களும் கொண்டே பொதுவுடைமை இயக்க முன்னோடிகள் தமது அரசியல் சமூக பண்பாட்டுப் பணிகளை அர்ப்பணிப்பு தியாகங்களின் ஊடாக முன்னெடுத்து வந்துள்ளனர். அதனாலேயே அவர்கள் சமூகத்தில் தனித்துவமுடையோராக நோக்கப்பட்டனர். அத்தகைய முன்னோடிகளில்; இரண்டாம் தலைமுறையைச் சேர்ந்தவரே தோழர் கே.ஏ.சுப்பிரமணியம். தான் வரித்துக்கொண்ட கொள்கையால் நடைமுறையால் சொந்த வாழ்வால் பொதுவுடைமையாளர்களுக்குரிய அடிப்படை நிலை நின்று வந்தவர். அதன் காரணமாகவே அவர் பொதுவுடைமை இயக்க முன்னோடிகளில் ஒருவராக நினைவு கூறபடுகின்றார்.

தோழர் கே.ஏ.சுப்பிரமணியம் தமிழர்களின் சமூகப் பரப்பிலே தொழிலாளர்கள், விவசாயிகள் மற்றும் தாழ்த்தப்பட்ட மக்களுக்கு மறுக்கப்பட்ட சமூக நீதிக்காகவும் உரிமைகளுக்காகவும் சமத்துவத்திற்காகவும் போராட்ட இயக்கங்களை முன்னெடுத்தவர்களின் வரிசையில் முன்னின்றவர். பொதுவுடைமைக் கட்சியின் தலைமைத்துவத்தில் தன்னை ஒருவராக்கிக் கொண்டவர். அதன் காரணமாக வடபுலத்தில் தொழிற்சங்க இயக்கத்தையும் சாதியத்திற்கு எதிரான 1966ம் ஆண்டு ஒக்ரோபர் 21 எழுச்சியின் ஊடான தீண்டாமை ஒழிப்பு வெகுஜன இயக்கத்தையும் முன்னெடுப்பதில் முன்னின்றார். 1966-77 காலகட்டத்திலான வெகுஜன எழுச்சிகளும் போராட்டங்களும் தமிழர்களுடைய வரலாற்றில் அன்றுவரை புறக்கனிக்கப்பட்டு வந்த தாழ்த்தப்பட்ட மக்களுக்கு மனித உரிமைகளையும் ஜனநாயகத்தையும் சமத்துவத்தையும் வென்றெடுக்க வழியேற்படுத்திக் கொடுத்தன. அதுமட்டுமன்றி பிற்காலத்தில் எழுந்த தமிழ்த் தேசிய இனவிடுதலைப் போராட்டம் என்ற தளத்தில் அனைத்துத் தமிழர்களையும் ஒன்றுபட வைத்ததற்காக அடிப்படைகளையும் வெகுஜனப் போராட்டங்கள் ஏற்படுத்திக் கொடுத்தன என்பது சிலர் மறந்துகொள்ளும் ஒன்றாகும். இவ்வெகுஜனப் போராட்ட காலங்களில் தோழர் கே.ஏ.சுப்பிரமணியத்துடன் இணைந்து நின்று போராட்டப் பணியாற்றிய நினைவுகள் இன்றும் பசுமையானவைகளாகவே இருந்துவருகின்றன. நெஞ்சில் உரமும், கொண்ட கொள்கையில் நேர்மைத்திறனும், உழைக்கும் மக்கள் மீதான போராட்ட நம்பிக்கையையும் கொண்ட புரட்சிகரப் பொதுவுடைமைவாதியாக தலைமைத்துவ வழிகாட்டியாக வாழ்ந்து மறைந்தவர் தோழர் மணியம். அவருடனான நினைவுகள் பகிரப்படும் போது அவை போராட்டத்தையும் சமூக மாற்றத்தையும் வேண்டி நிற்கும் இளம் தலைமுறையினருக்கு பயன் உள்ள அனுபவங்களாக அமைய முடியும் என்று நம்புகின்றோம்.

அத்தகையதொரு நேர்மையான பொதுவுடைமை இயக்க முன்னோடியின் நினைவுகளின் ஊடாக சமகால அரசியல் போக்குகளை நோக்குவது அவசியமாகும். ஜனாதிபதியும் அவரது மஹிந்த சிந்தனை வழிகாட்டலிலான ஐக்கிய மக்கள் சுதந்திர முன்னணி அரசாங்கமும் தமது இரண்டாவது பதவிக்காலத்தின் உச்சநிலையில் இருந்து வருகின்றார்கள். அந்த உச்சநிலை ஆட்சி அதிகாரத்தைக் கொண்டிருப்பதற்கு நான்கு நிலைகளில் செயல்பட்டு அவற்றை நிலைநிறுத்தி வைத்துக் கொண்டார்கள். ஒன்று அரசியலமைப்பிற்கான 18வது திருத்தத்தை நிறைவேற்றியதன் மூலம் தனிநபர் சர்வாதிகாரத்தை மேலும் விஸ்தரித்து குடும்ப ஆட்சியை வலுப்படுத்திக் கொண்டமை. இரண்டாவது, பாராளுமன்றப் பெரும்பான்மையை பல்வேறு கட்சிகளையும் உள்ளீர்த்து மூன்றிலிரண்டுக்கு மேல் தக்கவைத்துக் கொண்டமை. மூன்றாவது, ஆயுதப்படைகளை முறைமைப்படுத்தியும் வலுப்படுத்தியும் தமக்கும் தமது ஆளும் வர்க்க சக்திகளுக்கும் உரிய அரனாக மாற்றிக்கொண்டமை. நான்காவது பௌத்த சிங்கள பேரினவாதத்தை வெளிப்படையாகவும் உள்ளார்ந்த அடிப்படையிலும் பற்றி நின்று சிங்கள மக்களை திசை திருப்பி வைத்திருப்பது. மேற்கூறிய நான்கு முக்கிய தூண்களிலேயே இன்றைய மஹிந்த சிந்தனை அரசாங்கம் தன்னை நிலைநிறுத்தி நிற்கின்றது.

இத்தகைய மஹிந்த ராஜபக்ஷ அரசாங்கமானது நாட்டின் ஏகப்பெரும்பான்மையான உழைக்கும் மக்களுக்கு எதிராகப் பொருளாதார அரசியல் தளங்களில் தரகு முதலாளித்துவ பேரினவாத செயற்பாடுகளை முன்னெடுத்து வருகின்றது. ஒன்று நவகொலனித்துவ அமைப்பு முறையை வலுப்படுத்தும் வகையிலான நவதாராளவாத பொருளாதாரத்தை விஸ்தரித்துச் செல்வதற்கு ஆக்கமும் ஊக்கமும் கொடுத்து வருகின்றமை. இரண்டாவது, யுத்தத்தின் மூலம் வடக்கு கிழக்கையும் தமிழ் மக்களையும் அழித்து அவலங்களுக்குள் தள்ளியது மட்டுமன்றி யுத்தத்திற்குப் பின்பும் தொடர்ந்து பேரினவாத ஒடுக்குமுறையினை ராணுவ மயப்படுத்தலின் ஊடாக முன்னெடுத்து வருவதுமாகும்.

மஹிந்த சிந்தனையின் தூரநோக்கு என்பதன் ஊடாக இலங்கையை ஆசியாவின் அதிசயமாக மாற்றப் போவதாக அரச சார்பு ஊடகங்களில் நீட்டி வாசிக்கப்படுகின்றன. ஆனால் இன்றைய மஹிந்த சிந்தனை அரசாங்கத்தின் மக்கள் விரோதப் போக்கை வெளிப்படுத்துவதற்கு ஜனாதிபதியினால் அண்மையில் முன்வைக்கப்பட்டுள்ள அடுத்த ஆண்டிற்கான வரவு செலவுத் திட்டம் தகுந்த உரைகல்லாகும். அதனை ஆழ்ந்து நோக்கும் எவரும் அதன் உள்ளார்ந்த மக்கள் விரோதப்போக்கை இலகுவாகவே அடையாளம் கண்டுக்கொள்ள முடியும். வரவு செலவுத் திட்டத்தில் பாதுகாப்பிற்கு ஒதுக்கியுள்ள இருபத்து மூவாயிரம் கோடி ரூபாவானது ஆகக்கூடிய தொகை என்பதைக் கவனத்தில் கொள்ளவேண்டும். பேரினவாத யுத்தத்தை முன்னெடுப்பதற்காக கட்டியெழுப்பப்பட்ட சுமார் நாலரை இலட்சம் ஆயதப்படைகளைப் பராமரிக்கவும் தீனிப்போட்டு வளர்த்துக்கொள்ளவுமே மேற்படி தொகை ஒதுக்கப்பட்டுள்ளது. அடுத்த ஆறு மாதத்தில் இத்தொகை மேலும் குறைநிரப்பு பிரேரனை மூலம் அதிகரிக்கப்படும் என்பதில் சந்தேகம் இல்லை. இவ்வாறு பாதுகாப்பு என்ற பெயரில் பேணப்படும் ஆயுதப்படைகள் அடிப்படையில் உழைக்கும் மக்களுக்கும் தேசிய இனங்களுக்கும் எதிராகவே பயன்படுத்தப்படும். இன்று வடக்கு கிழக்கு இராணுவ மயப்படுத்தல்களின் கீழ் முகாம்கள் விஸ்தரிக்கப்பட்டு நிரந்தரமாக்கப்படுவதுடன் மக்களின் இயல்பு வாழ்வை மறுத்து ராணுவ நிர்வாகம் மேன்மேலும் இறுக்கப்பட்டு வருகின்றது.

இதே நிலை வடக்கு கிழக்கிற்கு மட்டுமன்றி தெற்கிற்கும் விஸ்தரிக்கப்பட்டு வருகிறது. ஏனெனில் தெற்கில் தொழிலாளர்கள், ஊழியர்கள், வேலையற்றோர், மாணவர்கள் வீதிக்கு இறங்க ஆரம்பித்துவிட்டனர்.

தற்போது முன்வைக்கப்பட்டுள்ள வரவு செலவுத் திட்டம் நாட்டின் உழைக்கும் மக்களான தொழிலாளர்கள், விவசாயிகள், அரச மற்றும் தனியார் துறை ஊழியர்கள் என ஏகப் பெரும்பான்மையான மக்களைக் கவனத்திற் கொள்ளவேயில்லை. அவர்களுக்கு எவ்வித ஆறுதலையும் ஆதரவையும் வழங்கவில்லை. அரசாங்க ஊழியர்களுக்கான சம்பள உயர்வு என்பதுகூட ஏமாற்றேயாகும். வெறும் வாழ்க்ககைப் படியாகவே அன்றி அடிப்படைச் சம்பளம் அதிகரிக்கப்படவில்லை. அதேவேளை ஏற்கனவே வானத்தை நோக்கி உயர்ந்து செல்லும் அத்தியாவசியப் பொருட்களின் விலைகளைக் கட்டுப்படுத்தவோ அதன் மூலம் வாழ்க்கைச் செலவைக் குறைக்கவோ வரவு செலவுத் திட்டம் வழிவகைகளை முன்வைக்கவில்லை. அதற்குப் பதிலாக மேலும் விலைகள் அதிகரித்துச்செல்லும் வகையிலான மூன்று வீத நாணய மதிப்பிறக்கம் செய்யப்பட போகின்றது. நாட்டின் பொருளாதாரம் முற்று முழுதாகவே மறுகொலனியாக்கத்தின் ஊடாக நவகொலனித்துவமாக இறுக்கப்பட்டு வருகிறது. அன்று 1977ல் ஜே.ஆர். தொடக்கி வைத்த தாராளமயம், தனியார்மயம் மற்றும் திறந்த சந்தை என்ற நவதாராளப் பொருளாதாரத்திற்குள்ளும் அதற்கு வழிகாட்டி பாதுகாப்பு வழங்கி வரும் ஏகாதிபத்திய உலக மயமாதலுக்கும் மஹிந்த சிந்தனை மூலம் வலுசேர்க்கப்பட்டு வருகின்றது. நாட்டு வளங்கள் யாவும் அந்நிய பல்தேசியக் கம்பனிகளுக்கும் உள்நாட்டு பெருமுதலாளிகளுக்கும் தாரைவார்க்கப்பட்டு வருகிறது. இவற்றால் அற்ப சொற்பமாகவே இருந்து வந்த தேசிய பொருளாதாரம் என்பது அடிச்சுவடே இல்லாமல் அழிக்கப்பட்டு விட்டது. அதனாலேயே சர்வதேச நாணய நிதியமும் உலக வங்கியும் இன்றைய அரசாங்கத்திற்கு தொடர்ந்து கடனும் ஆலோசனைகளும் வழங்கி நிற்கின்றன. இவற்றை குறைந்தபட்சமாவது எதிர்ப்பதற்கு முன்னிற்க வேண்டிய பாராளுமன்ற இடதுசாரிகள் எனப்பட்டவர்கள் அரசாங்க அமைச்சர் பதவிகளும் சலுகைகளும் பெற்று எதுவும் தெரியாதவர்களைப் போன்று இருந்து வருகின்ற பரிதாப நிலையைக் காணமுடிகின்றது. ஜே.வி.பினர் மட்டுமே வீதியில் இறங்கி எதிர்ப்பு தெரிவித்து வருகின்றனர். அதுகூட வாக்கு வங்கியைப் பலப்படுத்தும் நோக்கிலேயே அன்றி அனைத்து உழைக்கும் மக்களினதும் ஒன்றுபட்ட எழுச்சியை நோக்கி அல்ல என்பது பகிரங்கமானதாகும். அவர்கள் பேரினவாத நிலைப்பாட்டிலிருந்து விடுபடமுடியாதவர்களாகவே இன்றும் இருந்து வருகிறார்கள். அதேவேளை ஜே.வி.பி. க்குள் அதிருப்தியாளர்களாகி வெளியேறியுள்ள மாற்றுக் குழுவினரது நடவடிக்கைகளையும் நிலைப்பாடுகளையும் பொறுத்திருந்தே பார்க்க வேண்டியுள்ளது.

இவ்வேளை மஹிந்த ராஜபக்ஷ தலைமையிலான அரசாங்கம் தேசிய இனப்பிரச்சினையில் முன்னெடுத்த கொள்கை நிலைப்பாடானது மிக மோசமானதாகும். யுத்தத்தின் மூலம் தீர்வு காண்பதில் முழுப்பலத்தையும் வல்லரசு மேலாதிக்க நாடுகளின் உதவி ஒத்தாசைகளுடன் பிரயோகித்துக் கொண்டது. அதனால் தமிழ் மக்கள் வரலாறு காணாத அழிவுகளையும் அவலங்களையும் அனுபவிக்க நேர்ந்தது. இன்றும் அவற்றிலிருந்து மீளமுடியாத மக்களாகவே வடக்கு கிழக்கு மக்கள் இருந்து வருகின்றனர். இவ்வாறான அழிவுகள் இழப்புக்கள் இடம்பெயர்வுகளுக்கு தொடர்ந்து வந்த பேரினவாத தரகு முதலாளித்துவ ஆளும் வர்க்க ஆட்சிகளும் அவர்களுக்கு அரவனைப்பு வழங்கிய இந்திய அமெரிக்க மேற்குலக நாடுகளும் மட்டுமன்றி சீனா, பாகிஸ்தான், ஈரான் போன்ற நாடுகளும் பங்காளிகளாவர். அதேவேளை தமிழ் மக்களுக்கு தலைiமை தாங்கி வந்த அனைத்துத் தலைமைகளும் குறிப்பாகத் தமிழீழ விடுதலைப் புலிகளின் யதார்த்தமற்றதும் மக்கள் சார்பற்ற அரசியல் இராணுவ அராஜகப் போக்குகளும் காரணம் என்பதை இலகுவில் தட்டிக்கழித்துவிட முடியாது. யுத்தம் முடிவுற்று தாம் வெற்றி பெற்றதாகக் கூறிக்கொண்டபோதும் தேசிய இனப் பிரச்சினைக்கு நியாயமான அரசியல் தீர்வு காணப்படுவதை மறுத்து இராணுவ ஒடுக்குமுறையின் கீழேயே வடக்கு கிழக்கையும் தமிழ் மக்களையும் வைத்திருப்பதிலேயே மஹிந்த சிந்தனையானது முனைப்புடன் இருந்துவருகின்றது. அதனை மக்கள் சார்பாகவும் மக்களோடு இணைந்து நின்றும் எதிர்ப்பது நேர்மையான ஒவ்வொரு பொதுவுடைமைவாதியினதும் இடதுசாரி என்போரினதும் கடமையாகும். அதேவேளை தமிழ்த் தேசியவாதம்; என்ற குறுகிய தேசியவாத நிலைப்பாட்டால் தமிழ்த் தேசிய இனத்தின் விடுதலைக்கு வழிகாட்ட முடியாது என்ற உண்மையும் யதார்த்தமும் மக்களுக்கு உணர்த்தப்படவேண்டும். இதுவரை எந்தவொரு தமிழ்த்தலைமையும் தமது கடந்தகாலம் பற்றி எவ்வித விமர்சனம் சுயவிமர்சனத்தையும் முன்வைக்கத் தயாராக இல்லை. தங்களது கொள்கைகள் வழிகாட்டல்களால் தமிழ் மக்களுக்கு ஏற்பட்ட அழிவுகளுக்கும் இழப்புக்களுக்கும் தகுந்த மன்னிப்பைக்கூட கேட்கத் தயாரில்லாத நிலையிலேயே தொடர்ந்தும் தமிழ் மக்களின் தலைவர்களாகத் தமிழ்க்கட்சிகள் தலைமைத்தாங்க முன்னிற்கின்றன. இது அன்றிலிருந்து இன்றுவரையான பழைமைவாத ஆதிக்க அரசியலை குறுந்தேசிய வாதமாக முன்னெடுப்பதன் தொடர்ச்சியாகவே காணப்படுகின்றது.
எனவே வர்க்கப் போராட்ட அரசியல் மார்க்கத்தில் உழைக்கும் மக்களின் தலைமையிலான பரந்துப்பட்ட வெகுஜன எழுச்சியும் போராட்டங்களுமே இன்றைய சூழலில் முன்னெடுக்கப்பட வேண்டியதாகவுள்ளது. இப்பாதையிலேயே சுயநிர்ணய உரிமையை வென்றெடுக்க முடிவதுடன் அதற்கான போராட்டமானது சிங்கள முஸ்லீம் மலையகத் தமிழ் மக்கள் ஆகிய அனைத்து உழைக்கும் மக்கள் முன்னெடுக்கும் வெகுஜனப் போராட்டங்களுடன் இணைத்தும் ஒன்றையொன்று ஆதரித்தும் முன்னெடுக்கப்படல் வேண்டும். தெற்கில் முன்னெடுக்கப்படும் ஜனநாயகத்திற்கான உழைக்கும் மக்களின் போராட்டங்களுடன் வடக்குக் கிழக்கின் சுயநிர்ணய உரிமைக்கான போராட்டங்கள் இணைக்கப்பட்டு முன்னெடுக்கப்படல் வேண்டும். அதே போன்று வடக்குக் கிழக்கில் தெற்கிலே முன்னெடுக்கப்படும் ஜனநாயகத்திற்கு உழைக்கும் மக்களின் உரிமைகளுக்கான போராட்டங்கள் இணைக்கப்பட வேண்டும். இவற்றுக்கான மாற்றுக் கொள்கையும் மாற்றுத் தலைமையும் மாற்றுப் போராட்ட மார்க்கமும் முன்நிலைக்கு வரவேண்டும்.
Thanks to http://www.athirady.info

மாவீரன் விடைபெற்ற நாள்! 27 கார்த்திகை 1989

2011-11-26T16:48:00.000-08:00

    வசதிகள் மிகக் குறைந்த ஒரு சின்ன வீடு தான் "சத்தியமனை". அது எங்கள் எல்லாராலும் அமைக்கபட்டது . பல வரலாறுகளை அதனுள் கொண்டுள்ளது.சிறு வயதில் அந்த வீட்டை சுற்றி மேதின ஊர்வலம் நடத்தியதும், "சிறுபொறி" பத்திரிகை நடத்தியதும், உண்டியலில் காசு சேர்த்து கட்சிக்கு கொடுப்பதும் , பல தலைவர்கள் கூடி பேசியதும் , வெற்றிகள், கவலைகள், கண்ணீர் , இரத்தம் எல்லாம் பார்த்த வீடு. மிக வறுமையிலும் சத்தியம் மட்டும் என்றும் குறைந்ததில்லை. அங்கு அப்பா தன்னுடைய நீண்ட காலத்தை தொடர்ந்து கழித்தார். ஏனெனில் பல வாடகை வீடுகளில் இருந்த போது எல்லாம், பொலிசாரின் கெடுபிடிகளால் தொடர்ந்து ஒரே வீட்டில் வசிக்க முடியவில்லை. இது எங்கள் மாமா ,தனது சகோதரியான எங்கள் அம்மாவுக்கு வாங்கி கொடுத்தது. வீட்டு உரிமையாளர் பிரச்னை இன்றி வசிக்க முடிந்தது.
    அப்பாவின் நேர்மைக்கும் , வீரத்துக்கும், தீர்மானத்துக்குமான பல நிகழ்வுகள் பற்றி தோழர்களும், எங்கள் அம்மாவும் சொல்ல கேட்டதுண்டு,பார்த்ததுமுண்டு. , ஆனால் இது என்கண் முன்னால் "சத்தியமனை " இல் நடந்த நிகழ்வு.
     1988 இன் இறுதி பகுதிகள் ,எனது மகள் பிறந்து மிக சில மாதங்களே ஆகியிருந்தது. அப்பா கடும் சுகவீனமுற்று யாழ் திரும்பி இருந்தார். இந்தியன் ஆர்மி இன் கெடுபிடிகள் அதிகமாக இருந்த நேரம். தெற்கில் சிறிமாவோ எதிர் கட்சியாக இருந்துகொண்டு , தனது தேர்தல் வாக்குறுதியில் தனது கட்சி ஆட்சிக்கு வந்தால் முதல் வேலையாக இந்தியன் ஆர்மியைவெளியேற்றுவோம் என்று தெரிவித்திருந்தார்கள். முற்போக்கு அணிகள் அனைத்தும் இணைந்து இந்தியன்ஆர்மிக்கு எதிரான வெளியேற்றத்துக்கு ஆதரவு தெரிவித்தன. வினோதன், மோதிலால் நேரு, குமார் ,பொன்னம்பலம் என பலரும் அப்பாவுடன் இதுபற்றி பேசிக்கொண்டு இருந்தார்கள். விடுதலை புலிகள் அமைப்பும் இதற்கு அதரவாக இருப்பதாக இடையில் இருப்போர் தெரிவித்தனர் . அங்கு இருந்த மாத்தையா ,பிரபாகரன் பிளவு பற்றி தெரிந்திருக்கவில்லை. சிறிமாவோவை   யாழ்பாணத்துக்கு அழைப்பதற்கான முடிவை கட்சி எடுத்தது. மொழிபெயர்பாளராக கட்சியின் ஆதரவாளரான மாமா ஒருவரை அழைப்பதாகவும் தீர்மானித்தனர் .

கூட்டத்துகு முதல் நாள் கட்சியின் அனைத்து மத்தியகுழு உறுப்பினர்களும் வந்திருந்தனர். மாலை கருகிய நேரம் திடீரென விடுதலை புலிகள் அமைப்பை சேர்ந்த தும்பனும், முன்னர் புளட் அமைப்பில் இருந்த வெற்றி என்கிற பையனும் ஆயுதத்துடன் வந்திருந்தனர், தும்பனை எனக்கு பாடசாலை காலத்தில் இருந்து தெரியும் அதே போல வெற்றியையும் தெரியும். வந்ததும் என்னிடம் தான் தும்பன் கேட்டார் , "உங்கள் அப்பாவுடன் பேசவேண்டும்" என்று ,அப்பா அறையில் இருந்தார் ,தும்பன் கொண்டு வந்த துப்பாக்கியை வாசல் கதவில் வைத்துவிட்டு ,வெற்றியையும் வாசலில் விட்டுவிட்டு உள்ளே வந்து ,சுற்றிவளைப்பு இன்றி "நீங்கள் நாளைக்கு கூட்டம் நடத்துவதை இயக்கம் விரும்பவில்லை "என்றார் .அதற்கு அப்பா " இது பற்றி நாங்கள் நீண்ட நாட்களாக பேசி வருகிறோம் , இப்போது இந்தியன் ஆர்மியின் வெளியேற்றம் என்பது அவசியம் " என்றார். அதற்கு தும்பன் " ஐயா இது எமது இயக்கத்தின் முடிவு, நீங்கள் நல்லவர் என்பது எங்களுக்கு தெரியும்,பொட்டரும்(நடராஜ ) நல்லவர் தான் ஆனால் அவரை போட்டது நாங்கள் தான் . அதாலை இதை நிறுத்துங்கோ " என்றார். அதற்க்கு அப்பா,மிக நிதானமாக , மிக தீர்மானமாக உயிரை பற்றிய கவலையற்று " இது இரவு நேரம், ஊரடங்கு வேளை வேறு, அவர் ஒரு நாட்டின் தலைவி ,காலையில் போய் இங்கு வராதை என்று சொல்ல முடியாது., இது அவசியம் என்று கருதுவதால் தான் இந்த முடிவை நாங்கள் எடுத்தோம். ஒன்று நீர் செய்யலாம், என்னை சுட்டுவிட்டு போம், சிலவேளை கூட்டம் நடக்காமல் போகலாம்" என்றார், "நான் சொல்றதை சொல்லிவிட்டேன் .."என்றபடி தும்பன் சென்றுவிட்டார். மீண்டும் கட்சி தோழர்களுடன் அப்பா கலந்தாலோசித்தார். (அந்த இடத்தில் நான் இருக்கவில்லை. ஆனால் என் கணவர் இருந்தார்.அது பற்றி நான் விபரிக்கவில்லை. )இரவு யாரும் சரியாக தூங்கவில்லை. ஆனால் கலையில் கூட்டம் இருப்பது உறுதியாகியது .

    அதிகாலை அப்பா வழமைபோல தூய வெண்மை வேட்டி, சட்டையுடன் தயார் ஆனார், இரவு நடந்த பிரச்னை பற்றி பொதுமக்கள் அறிந்திருக்கவில்லை. பல தோழர்கள் மேடை அமைப்பதற்காக பண்டதெருப்பு இந்து கல்லுரி மைதானத்தில் இருந்தனர். சுமூகமான சூழல் உள்ளதா என்று அறிவதற்காக அவர் தனியாக புறப்பட்டார். மொழிபெயர்க்க வந்த தோழருக்கும், கட்சியின் முக்கிய ஒரு உறுப்பினருக்கும் சடுதியாக நடுக்கத்துடன் காச்சல் வர, அவர்கள் வரவில்லை, மற்ற தோழர்கள் மிகுந்த உற்சாகத்துடன் கூட்டத்துக்கான ஆயந்தங்களில் ஈடுபட்டனர். எனது குழந்தை பிறந்து மூன்று மாதங்கள் முடிந்திருந்தது. நானும் வருகிறேன் என்று அப்பாவிடம் சொன்னேன் முதலில் மறுத்த அவர் வற்புறுத்தலின் பின் சம்மதித்தார். நானும், அப்பாவும் மீண்டும் திரும்பி வருவோம் என்கிற நம்பிக்கை என்மனசில் இல்லாமல் "சத்தியமனை" இலிருந்து வெளியேறினோம் .......
    "சத்தியமனை இலுருந்து இரண்டு சைக்கிளில் புறப்பட்டோம். சுழிபுரம் பிரதான சாலை, துரையப்பா கடை, இடும்பன் கோவில் சந்தி வரை ஆர்மியை காணவில்லை. அதில் இருந்த ஆர்மி எங்களை மறித்து சோதனை செய்தது . எங்கும் கூட்டத்தை பகிஷ்கரிப்பதற்கான சுவரொட்டிகள் இல்லை. பண்டதெருப்பு இந்து கல்லுரி மைதானத்தில் சில தோழர்கள் இருந்தார்கள்.அவர்களுடன் கதைத்துவிட்டு ,பண்டதெருப்பு பெண்கள் பாடசாலைக்கு போனோம். அங்கு தேவர் அண்ணையின் மனைவியும், மகனும் ஒரு உறவுப் பெண்ணும் இருந்தார்கள் .அவர்களுடன் ரத்வத்தை , கல்கட் சேர்ந்து சிறிமாவோவை அழைத்துகொண்டு மீண்டும் பண்டதெருப்பு இந்து கல்லுரி மைதானத்துக்குள் வந்தோம். உண்மையில் நான் அவ்வளவு ஜனக்கூட்டத்தை எதிர்பார்க்கவில்லை. கடுமையான உடல் உபாதையின் மத்தியிலும் மிக உற்சாகமாக அந்த கூட்டத்துக்கு அப்பா தலைமை தாங்கினார். சிறிமாவோ "இந்திய இராணுவத்தை வெளியேற்றுவோம்" என்றபோது ஜனக்கூட்டம் கைதட்டல்களுடன் ஆர்ப்பரித்து அடங்கியது .இதனை சுற்றி நின்ற இந்திய இராணுவம் பார்த்து நின்றது. கூட்டம் மிக வெற்றிகரமாக நடந்து முடிந்த காணொளி.................
.

    விடுதலை புலிகளால் அச்சுறுத்தல் இருந்ததை ஸ்ரீமவோவும் இந்திய இராணுவமும் அறிந்திருந்தார்கள். அதனால் சிறிமாவோ அப்பாவை கொழும்பு வரும்படி வற்புறுத்தினார். அதனை மறுத்து வெளியில் வந்த அப்பாவிடம் இந்திய இராணுவம் தாங்கள் பாதுகாப்பு தருவதாக கூறினார்கள். " உங்களை வெளியேற்றுவதற்காக தான் இந்த கூட்டத்தையே ஏற்பாடு செய்தோம் . " என்று மிக தெளிவாக ,தீர்மானமாக சொன்ன அப்பாவை மிக பெருமையுடனும் கர்வத்துடனும் பார்த்தேன். அந்த   உயர்ந்த மனிதனை நான் பொக்கிசமாக காக்க வேண்டும் என்று உணர்ந்தேன். நானும் அவருடன் செல்ல ஆயத்தம் ஆனேன். "நீங்களும் வரவேண்டாம் உங்களை தொடர்வதன் மூலம் தான் சிக்கல்கள் ஏற்படும் , நான் கவனமாக இருப்பேன். நீங்கள் போங்கோ "என்று முற்றாக மறுத்துவிட்டார்.
    சில மணி நேரங்களின் பின்னர் , அப்பா ஒரு விடுதலை புலியின் வீட்டில் தான் தொடர்ந்து சில நாட்கள் இருந்தார். நான் அங்கு சென்றும் பார்த்து வந்தேன். பின்னர் வந்த மேதின கூட்டத்தில் பங்கு பற்றியதும் , கடைசியாக சத்தியமனை " இல் இருந்து வெளியேற வேண்டிய சூழல் பற்றியும் தொடர்வேன்.

27 கார்த்திகை: விடுதலை புலிகளாலும், அநேக தமிழ் மக்களாலும் கொண்டாடப்படும் "மாவீரர்" தினம். எங்கள் அப்பாவின் அந்த பெருமை மிகுந்த இல்லத்தை ஒரு நூலகம் ஆகவும், குழந்தைகளின் விளையாட்டு இடமாகவும் மாற்றவேணும், . காலம் முழுவதும் , அந்த உயர்ந்த மனிதனின் சத்யம் வாழ்ந்த இடமாக அது இருக்க வேண்டும்!

திருமதி.சத்தியமலர் இரவீந்திரன் 27 November 2011

கே.ஏ.சுப்பிரமணியம் அவர்களின் 22ம் ஆண்டு நினைவு தினம் 27-11-2011

2011-11-22T12:58:00.000-08:00

கே.ஏ.சுப்பிரமணியம் அவர்களின் 22ம் ஆண்டு நினைவு தினம் 27-11-2011 ஞாயிற்றுக்கிழமை மாலை 5 மணிக்கு தேசிய கலை இலக்கிய பேரவை தலைமைப்பணிமனை மண்டபத்தில் நடைபெறவுள்ளது.

மலர்வு:----05-03-1931 உதிர்வு:----27-11-1989

K.A.Subramaniam's 22nd Anniversary Memorial Lecture will be held at 5pm

on Sunday 27 November 2011

Venue: 571/15 Galle Road Colombo 06, Sri Lanka

குறிப்பு: தேசிய கலை இலக்கியப் பேரவையின் தலைமைப் பணிமனையானது Roxy திரையரங்கிற்கு முன்னால், Cherry Fish கடையை அண்டிய ஒழுங்கையினுள் அமைந்துள்ளது

மணியம் ஒரு மானிட அரும் பூ. -வள்ளியம்மை சுப்பிரமணியம்

2011-11-20T05:01:00.000-08:00

கே ஏ சுப்பிரமணியத்தின் நினைவு 22 வருடங்கள் (அமரர் 27 கார்த்திகை 1989) ,..........

மலர்வு:----05-03-1931 உதிர்வு:----27-11-1989

மணியம் ஒரு மானிட அரும் பூ....

--------------------------------------------------------------------------

தஞ்சை இளவரசியின் குதிரைமுகம் மாறிய மாவிட்டபுரத்தில் பிறப்பூ

பிஞ்சு வயதில் தமக்கையார் குடுப்பத்துக் கொழும்பில் வளர்ப்பூ

சென் - ஹென்றீஸ் கல்லூரியின் மாணவனாக ஆங்கிலப் படிப்பூ

தன்னுடன் படிக்கும் ந்ண்பன் கோவிலுக்குள் வரத்தயங்கிடத் தவிப்பூ

காங்கேயன் - சீமெந்து ஆலையில் பொறியியல் பயிலுநராய் நியமிப்பூ

அங்குள்ள உணவகத்தில் குறிப்பிட்ட சாதியினரைத் தள்ளியதால் பதைப்பூ.

மேட்டுக்குடி மக்களுக்கு மாத்திரமே கதவுகள் திறப்பதால் பக்தியில் வெறுப்பூ

ஆட்டிப் படைக்கும் மதசம்பிரதாயம் மனிதனுக்கு அவசிய மில்லையெனத் துறப்பூ.

இடதுசாரிக் கொள்கைகளில் சமத்துவம் கண்டு ஈடுபட விருப்பூ

நடக்கும் பாதையை வழிமறிக்கும் நில ஆதிக்க நீசர்களில் கடுப்பூ

ஊர்வலம்,போராட்டம் நடக்கையில் ஊக்கமான துடிப்பூ

ஊர்வாய்க்கு அடங்கி ஒடுங்கி கூனிக்குறுகுவோர்க்கு மறுப்பூ.

ஆட்சியினர் எலும்புகளை அடித்து நொருக்கினாலும் முகத்திலே ஒரு சிரிப்பூ

வீழ்ச்சி ஒருபோதும் மானிடத்தை ஒடுக்காதென்பதில் தொடர்ந்த -உழைப்பூ.

மாற்றியக்கத் தோழர்களும் நாட்டுநலன் கொண்டால் கைகோர்க்க முனைப்பூ

நாற்றிசையும் ஐக்கியத்தை வலுப்படுத்த நாவசைக்கும் மனிதப் பண்பூ.

மணவாழ்வில் மறுக்காது தன்னுடன் வழிநடப்பாள் என்ற அன்பூ

இணக்கமான இருதயம் இருப்பது கண்டு உறுதியான மண முடிப்பூ.

கற்கைநெறி மானிட விழுமியத்தை நேசிக்கத் தொடர் வகுப்பூ.

முற்போக்குச் சக்திகளுடன் சகலரையும் இணைப்பதில் ஒத்துழைப்பூ.

“தாயகம்” இலக்கிய இதழை ஆரம்பித்து ஆயுள்பரியந்தம் தலையங்க வடிப்பூ

தகாத செயல்கண்டு விட்டால் தட்டிக்கேட்டு விசாரிக்கும் கண்டிப்பூ.

கருத்தரங்கம்,நூல் வெளியீடு,பத்திரிகை வளர்ச்சி கண்டு பூரிப்பூ.

விரும்பாத வீணர்போல் சோறுண்டு மரணிக்க விரும்பாத அரும் பூ.

--------------.

வள்ளியம்மை சுப்பிரமணியம்

தோழர் சிவதாசன் அவர்களுக்கு.........திருமதி வள்ளியம்மை சுப்பிரமணியம் அவர்களின் கவி-அஞ்சலி

2011-11-15T17:48:00.000-08:00

தோழர் சிவதாசன் அவர்களுக்கு.........திருமதி வள்ளியம்மை சுப்பிரமணியம் அவர்களின் கவி-அஞ்சலி

இளமைக் காலத்தில் இணைந்தாய் பொதுவுடமைப்

பழக்க மொழியூடே பங்கேற்பில் தேர்ந்திருந்தாய்

முழுக்கச் செயற்பட மூச்சாகக் கருமமாற்ற....

மாற்றுஅணி சேர்ந்து மனமுடைந்து போகாமல்....

ஆற்றுகின்ற சேவையது ஐக்கியத்தின் வெளிப்பாடு

போற்றுவார் போற்றட்டும் புழுதி வாரி தூற்றுவார்

தூற்றட்டும் என்ற திடத்துடனே நாடாளுமன்றத்திலும்

உந்தன் குரலையும் உரிமையுடன் ஒப்புவித்தாய்

தலைமையேற்றாய் 'கற்பகத்தின்' வளர்ச்சியிலும்

இயன்றவரை தமிழ்மக்கள் இன்னல்பல நீக்க......

முயன்று செயற்பட்டு மூச்சையும் வெளிப்படுத்தி

முகங்கொடுத்த இன்னல்கள்..... முரணான காலத்திலும்

உன்தன் பங்களிப்பை உரியகாலம் செய்ததனால்

நன்றியுடன் நினைவுகூரும் நல்லுளங்களில் வாழ்கின்றீர்.

திருமதி வள்ளியம்மை சுப்பிரமணியம்15 Nov 2011

தோழர் சங்கரப்பிள்ளை சிவதாசன் அவர்களின் மறைவுக்கு அஞ்சலி

2011-11-14T12:30:00.000-08:00

தோழர் சிவதாசன் அவர்களின் மறைவுக்கு அஞ்சலி

தோழர் சங்கரப்பிள்ளை . சிவதாசன் அவர்கள் 1934ம் ஆண்டு கொல்லங்கலட்டி மாவிட்டபுரத்தில் பிறந்து -கண்டி மாநகரத்தில் கல்விகற்று , தேசிய ஒருமைப்பாட்டுக்காக வாழ்நாள் முழுவதும் ஒத்துழைப்பு வழங்கியவர்.

தோழர் சிவதாசன் அவர்கள், தோழர் கே.ஏ. சுப்ரமணியத்தின் அன்பு மைத்துனரும் மிக நெருங்கிய பால்யகாலத்து நண்பரும் ஆவார். இருவரும் முற்போக்கு வாலிபர் இயக்கங்களில் இணைந்து பங்கு கொண்டவர்கள். அவர்களது உறவு , அவரது இறுதிகாலம் வரை குடும்ப உறவாக நீடித்தது. பல மொழிகளில் மிக பாண்டித்தியம் பெற்றிருந்தார். பாராளுமன்ற உறுப்பினர் ஆக பதவி வகித்த காலத்தில் எம் மக்களுக்கு தன்னால் இயன்ற பங்களிப்பை செய்தார். அவரது ஆத்மா சாந்தி பெற, அவர் விரும்பி நேசித்த "சத்தியமனை" தனது துக்கத்தை தெரிவித்துகொள்கிறது.

என் மகன் மாத்திரமா? மண்ணுக்காகவும், மக்களுக்காகவும் மரணித்த அனைத்து இயக்கப் போராளிகளை நினைவு கூர்ந்து........27 கார்த்திகை 2011

2011-11-11T23:49:00.000-08:00

என் மகன் மாத்திரமா?
---------------------------------------
தந்தைதாய் அனுமதிக்க மாட்டார்கள் என்பதனால்
    முந்தித் தானெடுத்த முடிவினை நிறைவேற்ற
சுந்தரத்தின் வழிபார்த்து சந்ததியின் உபதேசத்தால்....
    பந்தபாசங் களைத்துறந்து...பக்தியாய்த் தமிழின்மேலே....
சிந்தனை செயல்கள் யாவும் சிதறாமலே நடந்து....
   நிந்தனை அனுபவித்து நேசித்த விடுதலையை...
அந்தகராய்ச் சிறைச்சாலை அரணான கோட்டைகுள்ளே....
   விந்தையாய் வருடங்கள் யுகங்களாய்க் கழிந்தனவாம்!
அந்திப் பொழுதினிலே அன்பான வீட்டைவிட்டு....
    சந்திக்குப் போகாமல் சந்துபொந்து வழிபார்த்து....
புந்தியைக் கல்லாக்கிப் புறப்பட்டுப் போனவர்கள்....
   சிந்தையில் விடுதலையை நேசித்த குற்றத்திற்காய்....
வந்தனை செய்தார்கள் வாதாடினால் ‘நாடு”என்று
    மந்தமாய் மறுதலிப்பு மாற்றமாய்ப் போனதாலே....
எந்தன் மகன் மாத்திரமா? எத்தனையோ ஆயிரம்பேர்....
   சொந்த பந்தங்கள் துடிக்கச் சொர்க்கம் போனாரோ?
                                                                                                                  வள்ளியம்மை சுப்பிரமணியம்

உயர்திரு கந்தையா முத்தையா அவர்கள்.................

2011-10-15T16:44:00.000-07:00

திரு கந்தையா முத்தையா
(இளைப்பாறிய அரச உத்தியோகத்தர் - யாழ்செயலகம், சமாதான நீதவான், முன்னாள் அகில இலங்கை தமிழ்காங்கரஸ் உறுப்பினர்)

பிறப்பு : 13 பெப்ரவரி 1931 — இறப்பு : 13 ஒக்ரோபர் 2011

உடுவில் அம்பலவானார் வீதியைப் பிறப்பிடமாகவும், சுழிபுரம் வீரபத்திரகோவிலடியை வதிவிடமாகவும், தற்போது கனடா Brampton ஐ வசிப்பிடமாகவும் கொண்ட கந்தையா முத்தையா அவர்கள் 13-10-2011 வியாழக்கிழமை அன்று இறைபதம் அடைந்தார்.

அன்னார், காலஞ்சென்றவர்களான கந்தையா இராசம்மா தம்பதிகளின் அன்பு மகனும், காலஞ்சென்ற நாகலிங்கம்(ஒய்வுபெற்ற கல்வி அதிகாரி), திருமதி.நாகலிங்கம் தம்பதிகளின் அன்பு மருமகனும்,

கமலாவதி(பவா) அவர்களின் அன்புக் கணவரும்,

காலஞ்சென்றவர்களான சுப்பிரமணியம், நடராஜா, திருநாவுக்கரசு மற்றும் செல்லத்துரை(திருநெல்வேலி) ஆகியோரின் அன்புச் சகோதரரும்,

கருணராஜன்(பிரான்ஸ்), வசந்தி(கனடா), சாந்தி(பிரான்ஸ்), சாந்தி(பிரான்ஸ்), ஜெயந்தி(கனடா) ஆகியோரின் அருமைத் தந்தையும்,

றமணி(பிரான்ஸ்), இலங்கேஸ்வரன்(Langes, B.Com(Hons), CGA, CGA Ambassador, Professor, Corporate Tax/HST, Auditor - Canada Revenue Agency), சற்குணராஜா(பிரான்ஸ்), கலைரூபன்(CMR Radio - Canada) ஆகியோரின் அருமை மாமனாரும்,

காலஞ்சென்ற செல்லம்மா மற்றும் இரத்தினமணி, செல்வமணி, காலஞ்சென்றவர்களான மனோன்மணி, பத்மாவதி, பத்மநாதன்(முன்னாள் உப அதிபர் மானிப்பாய் இந்துக்கல்லூரி, பிரபல பௌதீகவியல் ஆசிரியர்), இந்திராவதி(கனடா),கமலநாதன்(மொழிபெயர்ப்பாளர் - பிரான்ஸ்), சோதிநாதன்(CSA Medical Faculty University Of Western ON) ஆகியோரின் அன்பு மைத்துனரும்,

ஆர்.கே.சுப்பிரமணியம்(Assisstant Director, Janavasam State Plantation Ratnapura), கே.செல்வரட்ணம்(Surveyor), சந்திராதேவி(ஆசிரியை இந்துமகளிர் கல்லூரி), ஜெயராணி(லண்டன்), நிர்மலாதேவி(லண்டன் ஒன்ராரியோ -கனடா) ஆகியோரின் அன்புச் சகலனும்,

கஜன், சாருஜன், அபிநயா(கனடா), லாவண்யா, ராகவன், சுகனியா, சாரங்கன், சாருஷா(பிரான்ஸ்) ஆகியோரின் அன்புப் பாட்டனாரும் ஆவார்.

இவ் அறிவித்தலை உற்றார், உறவினர், நண்பர்கள் அனைவரும் ஏற்றுக்கொள்ளுமாறு கேட்டுக்கொள்கின்றோம்.
தகவல்
குடும்பத்தினர்
நிகழ்வுகள்
பார்வைக்கு
திகதி:    சனிக்கிழமை 15/10/2011, 05:00 பி.ப — 09:00 பி.ப
முகவரி:    Brampton Memorial Chapel 10061 Chinguacousy Road, Brampton
பார்வைக்கு
திகதி:    ஞாயிற்றுக்கிழமை 16/10/2011, 05:00 பி.ப — 09:00 பி.ப
முகவரி:    Brampton Memorial Chapel 10061 Chinguacousy Road, Brampton
பார்வைக்கு
திகதி:    செவ்வாய்க்கிழமை 18/10/2011
முகவரி:    Visitation at Home :15 Tideland Drive, Brampton, Ontario, L7A 2W3
கிரிகை
திகதி:    செவ்வாய்க்கிழமை 18/10/2011, 09:30 மு.ப — 01:30 பி.ப
முகவரி:    Brampton Memorial Chapel 10061 Chinguacousy Road, Brampton
தகனம்/நல்லடக்கம்
திகதி:    செவ்வாய்க்கிழமை 18/10/2011, 01:30 பி.ப
முகவரி:    Meadowvale Crematorium, 7732 Mavis Road
தொடர்புகளுக்கு
இலங்கேஸ், வசந்தி — கனடா
தொலைபேசி:    +14165091200
செல்லிடப்பேசி:    +19054952395
கலைரூபன், ஜெயந்தி — கனடா
தொலைபேசி:    +19058402164
செல்லிடப்பேசி:    +19057817691
கருணராஜன்(ராசன்) — பிரான்ஸ்
தொலைபேசி:    +33143836577
சற்குணராஜா, சாந்தி — பிரான்ஸ்
தொலைபேசி:    +33143327587
செல்லிடப்பேசி:    +33661194542
பவா — இலங்கை
செல்லிடப்பேசி:    +94776158719

நூல் அறிமுக விழா: தீண்டாமைக் கொடுமைகளும்… தீ மூண்ட நாட்களும்…

2011-10-08T22:47:00.000-07:00

யாருக்கு விருது?

2011-10-05T23:02:00.000-07:00

யாருக்கு விருது?

’’’’’’’’’’’’’’’’’’’’’’’’’’’’’’’’’’’’’’’’

காலுடைந்து போனபின்னும் சக்கர நாற்காலியில் சாதிக்க வேண்டுமென

நாலு கி.மீ ஓட்டத்தில் முதலிடத்தில் வந்து களைத்தவர்க்கு -

நாலிரண்டு வருடங்கள் தோல்விமேல் தோல்விகண்டு நம்பிக்கையில்

காலூன்றி நின்ற தாய்க்கு இரட்டைக் குழந்தைகள் கிடைக்கவைத்த மருத்துவர்க்கு -

வாலறுந்த பட்டம்போல் வாழ்வில் குறிக்கோளற்ற ஊதாரி இளைஞனுக்கு

மேலும் மனிதனாக வாழலாமென்று வழிவகுத்த மஞ்சள்நாடா குழுவினர்க்கு -

சின்னஞ் சிறுவயதில் சிந்திக்கும் திறனை வளர்த்த பெற்றோரின்

சொன்னசொற் தவறாது வளர்ந்து தன்நாட்டிற்குப் பெருமைசேர்த்த மகளுக்கு -

விஞ்ஞான ஆராய்ச்சியினால் விண்வெளியில் தடம்பதித்து மீண்டு

அஞ்ஞானம் அகல அனைவர்க்கும் வழிகாட்டும் அணுவிஞ்ஞானிக்கு -

சும்மா கிடைத்தால் அதன்பெயர் விருது அல்ல; அதைக்கருதி

தம்மால் இயன்றவரை அடுத்தடுத்து முயன்றபின்னும் தோல்விவர

“அம்மா” எனப் பெருமூச்சில் அவன்கண்ணால் மழைபொழியத் துவளாமல்

நம்மால் முடியுமென்ற நம்பிக்கை நெருப்பாற்றில் எதிர்நீச்சல் போட்டவர்க்கே!

வள்ளியம்மை சுப்பிரமணியம்.

வள்ளியம்மை சுப்பிரமணியம் 72வது பிறந்தநாள் காணொளி 07/10/2010

2011-09-21T07:01:00.000-07:00

வள்ளியம்மை சுப்பிரமணியம் 72வது பிறந்தநாள் காணொளி 07/10/2010

அம்மா

நீ நடந்த காலடி தடங்களில்,

தேங்கிய வியர்வைஉடன்

சேர்ந்து - கண்ணீரும் சொல்லும்

உன் கடந்த காலம்.-

வேலையால் வீடு திரும்பி

உடுத்திய புடவையை

கதவில் போட்டால்,

மறுநாள் வேலை செல்லும் வரை

கால்களில் சக்கரம் தான்.

பச்சை தென்னம் மட்டையை

இரவு தணித்த நெருப்பில் காய வைத்து

பால் கறந்து , வீடு பெருக்கி

எங்களை குளிக்க வார்த்து

சாப்பாடு தந்து அப்பாக்கு மருந்தும் தந்து

வீடுக்கு வரும் தோழர்களை வரவேற்று

இன்முகம் காட்டும் அம்மா.

அனேகமாக முருங்ககை குழம்பும்

வாழைக்காய் பொரியலும் தான் சாப்பாடு

இரண்டுமே வீட்டில் இருக்கும்.

கிணறு கலக்கி இறைத்து சாம்பிராணி இடுவதில் இருந்து ,

மாவு இடித்து இட்டியப்பம் அவித்து

ஓலை பின்னி வேலி அடைப்பது வரை நீதானம்மா .

நீ தூங்கி நாம் பார்த்ததில்லை .

பலகாலம் நீ படித்தவ என்பதே எமக்கு தெரியவில்லை ,

எல்லாமே அப்பா தான் - என்று உணரவைத்தாய் .

அப்பாவை போலீஸ் தேடிய காலங்களில்

பல பல வீடுகள் மாறினோம் .

வாடகை வீடுக்கு நீ பட்ட கஷ்டம் அன்று

எமக்கு உணரும் வயசில்லை.

இளம் வயதில் தனி மாதாக -நீ

பட்ட கஷ்டம் புரியவில்லை.

துரத்தும் போலீஸ் உம் , நகையாடும் உறவுமாய்

நீ வாழ்ந்த வாழ்வு, காதலின் வெற்றி!

எமது நாட்டின் இரண்டு பெரும் சகாப்தங்களின்

வாழ்வு நாயகி நீ.

கொள்கைக்கு மாறுபட்ட குழந்தையும்

கோபமுறும் கணவனும் ,

பகல் பொழுதில் மார்க்சியம் பேசும் தோழர்கள்

இருட்டில் பிரிவினை கேட்கும் குழந்தைகள்

சமையலே உன் வாழ்வாகி போனது.

வறுமையின் உச்சத்திலும் நீ வாடி

நாம் பார்த்ததில்லை.

மக்கள் கழக சுந்தரம், சந்ததியார் தன்னுடனே

சிங்களமொழி வகுப்பில் சேர்ந்து படித்தாய்

பீட்டர் கெனமன், சண்முகதாசன் மாமா இலிருந்து

சிறிமாவோ பண்டாரநாயக்கா வரை பழகி இருந்தாய்

மக்களுக்காக அமரர் ராஜீவ் காந்தி இலிருந்து
மகிந்த ராசபக்ச வரை கடிதம் எழுதி இருந்தாய்

சாதி எதிர்ப்பு போராட்டத்தில் படுகாயம் பட்ட

அப்பாவை - மூன்று சிறு குழந்தைகளுடன்

குழந்தையாய் காப்பாற்றினாய் .

பின் மே தினம் ஒன்றின் (1969)பெரும் போரட்டத்தில்

சிதறிய அப்பாவின் அங்கங்களை ஒட்டவைத்தாய் .

அம்மா,

ஓய்வு பெறும் வயதில் சிறைச்சாலை தோறும் சென்று

அண்ணாவை பார்த்து வந்தாய்.

இடை மறிக்கும் போலிகள்,

உளவு சொல்லவா என்று கேலி பேசும் போது

அரசியல் தெரியாத அந்த கூட்டத்துக்கு

வரலாறு சொன்னது கேட்டு மலைத்து நின்றிருக்கிறேன்.

பிரிவினையை வெறுத்த அப்பா -இந்திய இராணுவம்

வெளிச்சத்திற்கு வந்த வேளை-இல்

கோபு மாமா உதவி கேட்டு வந்தார்

பத்திரிகை வெளி வரவும் உதவியதுடன்

குண்டுகளின் சிதறல்களின் நடுவே

உணவும் சமைத்து கொடுத்தாய் , பயந்தோடவில்லை.

புன்சிரிப்பும் பொறுமையும் உன் ஆயுதங்கள்

உன் அளவுக்கு எனக்கு ஆளுமை இல்லை ,

அறிவும் இல்லை ஆனால்

இன்றுவரை உனக்காக ஏதும் நான் செய்ததில்லை.

நேற்று கூட உன் ஓய்வூதிய பணம் எனக்கு வந்தது.

உனக்கான என் கண்ணீரை கூட -இதுவரை

நான் காட்டியதில்லை .

எழுபதுகள் கடந்தும் ஏற்றமாக இருக்கிறாய் அம்மா.

அன்பு அனைத்தையும் வென்றிடும் என்று சொல்லுவாய் .

முயற்சிக்கிறேன் முழுமையாய் வாழ.

உங்கள் வளர்சிக்கும , மகிழ்ச்சிக்கும் காரணமான

என் தம்பிக்கு நன்றிகள் .

இன்று அப்பாவும் அண்ணாவும் இல்லை- அனால்

மரணத்தின் பின்பும் அவர்களை வாழ வைக்கிறீர்கள்

நிறைய வாசியுங்கள், எழுதுங்கள்.

உங்கள் வாழ்வின் வெற்றி சத்தியமனையின் வெற்றி!

நூறாண்டு வாழ வாழ்த்துகிறேன்.

அன்பு மகள்-திருமதி.சத்தியமலர் இரவீந்திரன் 4 October 2010

சிங்கப்பூர் கவிஞர் பா.திருமுருகனின் "ஊதாங்கோலும் ஒரு துண்டு நெருப்பும்" கவிதைத் தொகுப்பு நூல் அறிமுக விழா

2011-09-07T02:31:00.000-07:00

செய்திகள்

சிங்கப்பூரில் நூல் அறிமுக விழா

செப்டம்பர் 05,2011,16:50 IST

சிங்கப்பூர் : சிங்கப்பூர் கடற்கரைச் சாலை கவிமாலை அமைப்பின் ஏற்பாட்டில் கவிஞர் பா.திருமுருகனின் "ஊதாங்கோலும் ஒரு துண்டு நெருப்பும்" கவிதைத் தொகுப்பு நூல் அறிமுக விழா செப்டம்பர் 04ம் தேதியன்று மாலை மிகச் சிறப்பாக நடைபெற்றது. முற்றிலும் புதுமையாக மகளிரே நடத்திய இவ்விழா, இலக்கியா மதியழகனின் தமிழ் வாழ்த்துடன் முனைவர் சத்திய பாமா முத்தமிழ்ச் செல்வன் தலைமையில் துவங்கியது. கவிஞர் கலையரசி செந்தில்குமார் வாழ்த்துப் பா வாசித்தளித்தார். தொடர்ந்து முனைவர் தேன்மொழி சண்முகவேல் நாட்டுப்புறப் பாடல் பாணியில் பாடி வாழ்த்துரை வழங்கினார். பல்வேறு இலக்கியங்களிலிருந்து மேற்கோள்கள் காட்டி தற்கால இளம் கவிஞர்கள் புதுமை படைப்பதிலும், புதிய உத்திகளைக் கையாளுவதிலும், மனிதநேயப் பண்பாட்டிலும் சிறந்து விளங்குவதை முனைவர் சரோஜினி செல்லக் கிருஷ்ணன் எடுத்தியம்பி நூலாய்வுரை நிகழ்த்தினார். நூல் வெளியீட்டிலும் புதுமை காணப்பட்டது. ஒரு நாட்டுப்புற விறகு அடுப்பில் பானையில் நூலைப் போட்டு, மகளிர் சிறு பானை நீர் வார்க்க, வெளியீட்டாளர் டாக்டர்.இ.மாலதி ஊதாங்கோல் ஊத நூல் முகிழ்ப்பது போலக் காட்சிப்படுத்தியது அருமையிலும் அருமையாக அமைந்தது. சிங்கை தேசிய நூலக வாரிய அதிகாரி புஷ்பலதா கதிர்வேலு முதல் நூலைப் பெற, மலர்விழி ஜோதிமாணிக்கவாசகம், இந்திரா சுப.திண்ணப்பன், சந்திரா புருஷோத்தமன், சுதா இறைமதியழகன், வள்ளியம்மை சுப்பிரமணியம், அம்பை ஆ.பால சரஸ்வதி உள்ளிட்டோர் பெற்றுக் கொண்டு நூலாசிரியரை வாழ்த்தினர். திலகவதி அன்பழகன் சிறப்பு விருந்தினர்களுக்குப் பொன்னாடை போர்த்தி கவுரவித்தார். கவிஞர் சங்கரி சரவணன் சுவைபட நிகழ்வினை நெறிப்படுத்தினார். திரளான இலக்கிய ஆர்வலர்கள் கலந்து கொண்ட இந்நிகழ்வு, கவிஞர் பா.திருமுருகனின் ஏற்புரையோடு நிறைவுபெற்றது.

- நமது செய்தியாளர் வி.புருஷோத்தமன்

Thanks to http://www.dinamalar.com/

மூன்று உயிர்கள் காக்க தன்னுயிர் தந்த தியாகி செங்கொடி- நன்றி கவிஞர் இரா .இரவி

2011-09-03T21:23:00.000-07:00

மறைந்தும் மறையாத
துருவ நட்சத்திரம்
செங்கொடி

இனமானத் தீயை
மூட்டிய தீ
செங்கொடி

செங்கொடிகளையும்
வாய் திறக்க வைத்தவள்
செங்கொடி

மூன்று உயிர்கள் காக்க
தன்னுயிர் தந்த தியாகி
செங்கொடி

மனிதாபிமான மற்றவர்களுக்கு
மனிதாபிமானம் போதித்தவள்
செங்கொடி

தன்னை எரித்து
தமிழ்ப் பகை எரித்தவள்
செங்கொடி

உடலால் எரிந்து
உணர்வால் வாழ்பவள்
செங்கொடி

அய் நாவில் ஈழக்கொடி
பறக்க வழிவகுத்தவள்
செங்கொடி

முத்துக்குமாரின் வழியில்
முத்திரைப் பதித்தவள்
செங்கொடி

தூங்கியத் தமிழினத்தை
தன்னை எரித்து எழுப்பியவள்
செங்கொடி

இன எதிரிகளின்
முகத்திரைக் கிழித்தவள்
செங்கொடி

ஈழத்துத் தீலிபனை
நினைவூட்டிச் சென்றவள்
செங்கொடி

இயந்திர உலகில்
இளகிய இதயம் பெற்றவள்
செங்கொடி

சுயநல உலகில்
பொதுநல இமயம்
செங்கொடி

உயிர் ஆயுதம் ஏந்தி
எதிரிகளை வீழ்த்தியவள்
செங்கொடி

ஒரே நாளில்
உலகப் புகழ்ப் பெற்றவள்
செங்கொடி

புலம் பெயர்ந்த தமிழர்களின்
புலம் உணர்த்தியவள்
செங்கொடி

அய்ம்புலனை அழித்து
அறிவுப் புகட்டியவள்
செங்கொடி

தமிழ் இனத்தின் தியாகத்தை
தரணிக்குக் கற்பித்தவள்
செங்கொடி
--

நன்றி
அன்புடன்
கவிஞர் இரா .இரவி http://eraeravi.blogspot.com/2011/09/blog-post.html

ஏணியும், தோணியும்.

2011-08-28T08:05:00.000-07:00

ஏணியும், தோணியும்.

‘’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’

ஏணி உதவுகிறது மேலேபோகக் கீழேவர.....

தோணி செய்கிறது கரையேறக் கரையிறங்க....

ஆணிகள் ஓட்டைகள் அடிக்கடி சரிபார்த்துப்

பேணிப் பாதுகாத்து நிலமட்டம், நீர்ச்சுழற்சி, காற்றழுத்தம் - கண்

காணிக்க வேண்டியது மனிதனின் செயற்பாணி!

2011-08-26T07:12:00.000-07:00

ந-இரவீந்திரனின் " முற்போக்கு இலக்கிய எழுச்சி" நூல் ஆய்வரங்கு / கலந்துரையாடல்

அழைப்பு / ஏற்பாடு

இலங்கை முற்போக்குகலை இலக்கிய மன்றம்.

இடம்.

பெண்கள் கல்வி ஆய்வு நிறுவன கேட்போர் கூடம்.

58, தர்மராம வீதி கொழும்பு-06

காலம்

28, ஆகஸ்ட் 2011 ஞாயிறு

நேரம்.

மாலை---- 4-30

அனைவரையும் அன்புடன் அழைக்கின்றோம்.

முற்போக்கு இலக்கிய எழுச்சி...........

நான்கு முன்னோடி முற்போக்கு

எழுத்தாளர்கள்

ஆய்வரங்கம்

தலைமை

கலாநிதி-செல்வி- திருச்சந்திரன்

ஆய்வாளர்கள்

முற்போக்கு இலக்கியம்.

சபா- ஜெயராசா

(1) என் -கே - ரகுநாதன்.பற்றி திக்வல்ல கமால்.

(2)கே-டானியல் பற்றி லெனின் மதிவாணம்.

(3)டொமினிக் ஜீவா பற்றி எம்- தேவகெளரி

(4)நீர்வை-பொன்னையன் பற்றி வ-மகேஸ்வரன்.

ந.இரவீந்திரனின் 'முற்போக்கு இலக்கிய எழுச்சி'

ந.இரவீந்திரனின் 'முற்போக்கு இலக்கிய எழுச்சி' நூல் ஆய்வரங்கும் கலந்துரையாடலும் எதிர்வரும் 28.08.02011 ஞாயிறு மாலை 4.30 மணிக்கு நடைபெற உள்ளது.

நான்கு முன்னொடி முற்போக்கு எழுத்தாளர்களான

என்.கே.ரகுநாதன்
கே.டானியல்
டொமினிக் ஜீவா
நீர்வை பொன்னையன்

ஆகியோர் படைப்புகள் பற்றி

இடம்:-

பெண்கள் கல்வி ஆய்வு நிறுவன கேட்போர் கூடம் (WERC)

58,தர்மாரா வீதி

கொழும்பு 0.6

தலைமை:- கலாநிதி.செல்வி திருச்சந்திரன்

ஆய்வாளர்கள்

திக்குவல்லை கமால்
லெனின் மதிவாணம்
எம்.தேவகெளரி
வ.மகேஸ்வரன்

அனைவரையும் அன்புடன் அழைக்கின்றோம்.

அழைப்பு / ஏற்பாடு

இலங்கை முற்போக்குகலை இலக்கிய மன்றம்.

என் மகன் சத்தியராஜனை இழந்து 10 வருடங்கள் ...... என் மகனை நினைவு கூர்ந்து ............

2011-08-24T20:19:00.000-07:00

இன்று 25 08 2011 என் மகன் சத்தியராஜனை இழந்து 10 வருடங்கள் ...... என் மகனை நினைவு கூர்ந்து ............

என் மகன் மாத்திரமா?

---------------------------------------

தந்தைதாய் அனுமதிக்க மாட்டார்கள் என்பதனால்

முந்தித் தானெடுத்த முடிவினை நிறைவேற்ற

சுந்தரத்தின் வழிபார்த்து சந்ததியின் உபதேசத்தால்....

பந்தபாசங் களைத்துறந்து...பக்தியாய்த் தமிழின்மேலே....

சிந்தனை செயல்கள் யாவும் சிதறாமலே நடந்து....

நிந்தனை அனுபவித்து நேசித்த விடுதலையை...

அந்தகராய்ச் சிறைச்சாலை அரணான கோட்டைகுள்ளே....

விந்தையாய் வருடங்கள் யுகங்களாய்க் கழிந்தனவாம்!

அந்திப் பொழுதினிலே அன்பான வீட்டைவிட்டு....

சந்திக்குப் போகாமல் சந்துபொந்து வழிபார்த்து....

புந்தியைக் கல்லாக்கிப் புறப்பட்டுப் போனவர்கள்....

சிந்தையில் விடுதலையை நேசித்த குற்றத்திற்காய்....

வந்தனை செய்தார்கள் வாதாடினால் ‘நாடு”என்று

மந்தமாய் மறுதலிப்பு மாற்றமாய்ப் போனதாலே....

எந்தன் மகன் மாத்திரமா? எத்தனையோ ஆயிரம்பேர்....

சொந்த பந்தங்கள் துடிக்கச் சொர்க்கம் போனாரோ?

வள்ளியம்மை சுப்பிரமணியம்