Friday, June 2, 2017

எனது சின்னப் பேத்தி சிறீரா , விவேக்கின் திருமண நிச்சயதார்த்தத்தின் போது…22 May 2017

-------
வாழ்த்துக்கள்.
--------------
திருநிறை .இராஜசேகர், திருமதி .வள்ளி தம்பதிகளின் ஏகபுத்திரனாகிய
Dr.விவேக் அவர்களும்,
திருநிறை. சத்தியகீர்த்தி, திருமதி. சுசித்ரா தம்பதிகளின் மூத்த மகளான
Dr. ஶ்ரீரஞ்சினி அவர்களும்,
விவாகம் செய்து கொள்ளும் பொருட்டு - முன்னோடியாக விவாகப்பதிவு
நிகழ்ச்சிக்கு உற்றார்,உறவினர்கள்,நண்பர்கள்
அனைவரும் ஒன்றுகூடியிருக்கும் இவ்வேளையில், அந்த இணையர்களை
அவர்களின் பாட்டியுடன், உடனிருந்து வளர்த்தவருமாகிய
திருமதி. வள்ளியம்மை சுப்பிரமணியம் அவர்கள், வாழ்த்திப் பாடிக்கொடுத்த
வாழ்த்துப் பாக்கள்.
-------------------
சிங்கப்பூர் என்ற சீரோங்கும் நாட்டினிலே
மங்காப் புகழுடைய 'இராஜ சேகர்' என்பவரும்,
தங்கம் நிகரான ' வள்ளி' என்ற தாய்க்குலமும்
பொங்கும் வைத்திய நிபுணரெனப் பெயரெடுக்க
ஒரேயொரு செல்வமகன் சிந்தையால், செயலால்....
மலர்போன்ற சிரித்த முகம், மாண்பு கொண்ட பண்பாளன்
பெரியோர்கள் மதிக்கும் பெருங்குணமுங் கொண்டவனாய்....
வைத்திய கலாநிதி ' விவேக்' என்ற வித்தகனும்.....
அவுஸ்ரேலியா நாட்டில் அமைதியாய் வாழ்கின்ற
' சத்திய கீர்த்தி' என்ற சகலரையும் பேணுகின்ற
உத்தமனும், 'சுசித்ரா' என்ற சகலகலா மேதையும்.....
முதல்குழந்தையாகப் பெற்றுப் பேணிவளர்த்து வைத்த
கல்வியில் கலைமகளாய்,வீணைஇசை மீட்டலிலும்
முன்னணியில் மிளிரும்'ஶ்ரீ ரஞ்சனி' என்ற மகள்
கண்ணுக்குக் கண்ணாக வைத்திய துறையை
எண்ணியபடியே கற்று முடித்த கவின்பெறு செல்வியும்....
இருவரும் இணையும் இந்நாள் ! ஒரு பொன்நாள்!!
பூவும் மணமும் போல,வானமும் நிலவும் போல....
நீவிர் இருவரும் பல்வேறு சிறப்புக்கள் பெற்று
'நீடூழி வாழ்க' வென சபையோர் சார்பாக...
நாமும் வாழ்த்துகின்றோம்!
சமர்ப்பணம்.
....................
பாரத தேசமும், பக்கத்து இலங்கையும்
பாரம்பரியமாக தமிழ்மொழியை நேசிக்கும்
இருபெரிய குடும்பங்கள் ஒன்றாய் இணைகின்ற
பெருமையே பெருமை! பேணுதற் குரியது!!
நன்றி......வணக்கம்.
22-05-2017. அன்புடன்.....பாட்டி,
வள்ளியம்மை சுப்பிரமணியம்."சத்தியமனை".

Tuesday, November 22, 2016

பொதுவுடமை இயக்கத்தின் புரட்சிகர முன்னோடி தோழர் கே.ஏ சுப்பிரமணியத்தின் 27 வது நினைவுக் கூட்டம்

பொதுவுடமை இயக்கத்தின் புரட்சிகர முன்னோடி தோழர் கே.ஏ சுப்பிரமணியத்தின் 27வது நினைவுக் கூட்டம் யாழ்ப்பாணத்தில் தேசிய கலை இலக்கியப் பேரவை கவிஞர் முருகையன் கேட்போர் கூடத்தில்  
27.11.2016 ஞாயிற்றுக்கிழமை 
பி.ப. 03.30 மணிக்கு நடைபெறும். 

Comrade K.A. Subramaniam: 27th Anniversary Event

27.11.2016 Sunday at 03.30 pm
Venue:
National Arts Council of Literary's
Poet Murugaiyan Auditorium 
(62, KKS Road, Kokuvil Junction, Jaffna)

Thursday, January 28, 2016

கே.ஏ.சுப்பிரமணியம் பல தடவைகள் பார்த்த, 1953ம் ஆண்டு வெளியாகிய "அவன்" என்ற படத்தின் பாடல்கள்

1953ம் ஆண்டு வெளியாகிய "அவன்" என்ற பெயரில் தமிழ் மொழிக்கு இந்தி மொழியிலிருந்து (ahh) எடுக்கப்பட்ட அற்புதமான ஒரு படம்.
இந்த அருமையான,எந்த விரசமுமற்ற புனிதமான காதலை
இரண்டு இளம் உள்ளங்கள் எப்படித் தங்களுக்குள் பரிமாறிக் கொள்ளுகிறரார்கள் என்பதனை படத்தின்
பாடல்கள் மூலம் கேட்டு உணர்ந்து கொள்ள முடியும்.
பாடல்களை கம்ப தாசன் எழுதியிருக்கிறார்.
50,60,70ம் ஆண்டுகளில் எங்கள் இலங்கை வானொலியில்
ஒலித்துக் கொண்டிருந்த 'அவன்' படப்பாடல்கள் பிறகு
கேட்க முடியாமலே போய்விட்டது. பழைய படங்களை
வெளியிடும் இந்தியத் தொலைக்காட்சிகள் கூட இதனைச்
செய்யத் தவறி விட்டன.
எனது 77 வயதுக்குப் பிறகு ....இளமையில்
பார்க்க முடியாத இந்தப்படத்தை இனிமேல் பார்க்கவே
முடியாத என்ற தாகம் என்னுள்ளே மறைந்து கிடந்தது.
எனது மகளுடன் கடந்த இரவு கலந்துரையாடினேன்.
என்ன அற்புதம்! .......மலேசியாவில்
வாழுகிற ஒருவரிடமிருந்து பெற்றுக் காட்டினார்.அதனைக்
காணொளிக்கு ஏற்றி வைத்த அந்த நண்பருக்கு நன்றி.
சென்ற ஆண்டு கூட எனது மகள்
பலவழிகளில் மடிகணனி மூலம் முயற்சி செய்தும்
கிடைக்காத 'அவன் ' பட தமிழ்ப்படப் பாடல்களும்
இந்திப் படமும் பார்கக்கிடைத்தது மறைந்த எனது
கணவன் கே.ஏ.சுப்பிரமணியம் அவர்கள் , இந்தப் படத்தை தான் 10 தடவைகள் திரும்பத் திரும்ப பார்த்தது "படத்தின் பாடல்கள் தான்"
அத்தனை அர்த்தம் பொதிந்தவையாக அமைந்திருந்தன'
என கூறியதுடன் அப் பாடல்களை தன் இனிமையான குரலினால் திரும்பத்திரும்ப ்்் திரும்ப பாடி ,என்னையும் சேர்ந்து பாடவைத்தார். என்னை அந்தப் படத்தைப் பார்க்குமாறும் கேட்டுக்கொண்டார். எங்கள் காதல் வாழ்க்கையில் இப்பாடல்கள் பெரிதும் இடம்பிடித்தன. (சித்தார்த்தமும், போராட்டமுமாக வாழ்ந்த கம்யூனிஸ்ட் ,தன் சுற்று சூழல், சொந்தங்கள் ,பணம், பொருள் எல்லாம் துறந்து ஆறடி அவ்வழகன் ... நாலடியும் இல்லாத தென்னோலை செத்தைக் குடிசைக்குள் ஒளிந்திருந்து பார்க்கும் இந்தக் குண்டு - வேறு சமூகப் பெண்ணை , அடம்பிடித்து "அரிவாள் சம்மட்டியை " தாலியாக்க் கட்டி மரணம் வரை தன் கொள்கையிலிருந்து மாறாது விடை பெற்றார்.)

ஒவ்வொரு மனிதரும் எவ்வளவு சுதந்திரமாக வாழவேண்டுமென
தனது வாழ்வை, இளமையின் வசந்தத்தை பொதுவுடமைத்
த்த்துவத்திற்கு அர்ப்பணித்தாரோ, அது போல் காதலை,
கலப்புத்திருமணத்தை அதன் அப்பளுக்கற்ற புனித த்தைச்
மதித்தார். சினிமாவில் வந்தாலும் பாராட்டத் தவற மாட்டார்....... அவருடன் நெருங்கிய தோழர்கள் அனைவரும் அவரின் குரலுக்கு ரசிகர்களே! வி ஏ, வி பி, கார்த்திகேசன், நீர்வை, ஜீவா, டானியல், மான், பின்னர் செந்தில்,இரவி, தேவர்,சந்திரன் என......
கடந்த இரவு 27-01-2016 இரவு தூங்கும் போது நேரம்
2-00 மணியாகி விட்டது. அவருடைய தூய்மையான
அன்பைச் சேவையை , வியந்த படியே தூங்க முடிந்தது
மீண்டும் எனது மகளுக்கும் உலகில்
வாழுகிற சகல மக்களுக்கும்.....அவரே பாடுகிற
இனிய ஓசை காதில் இப்போதும் கேட்கிறதல்லவா?
ஏ-எம்- ராஜாவும், ஜாக்கியும் தமது பாடல்களால்
இன்றும் வாழ்கிறார்கள்......நன்றி. வள்ளியம்மை சுப்பிரமணியம்

Saturday, December 19, 2015

தோழர் கே.ஏ.சுப்பிரமணியத்தின் 26 ம் ‌ஆண்டு நினைவு யாழ்ப்பாணத்தில்.........




பொதுவுடமை இயக்கத்தின் புரட்சிகர முன்னோடி தோழர் கே.ஏ சுப்பிரமணியத்தின் 26 வது நினைவுக் கூட்டம் யாழ்ப்பாணத்தில் தேசிய கலை இலக்கியப் பேரவை கவிஞர் முருகையன் கேட்போர் கூடத்தில் நடைபெற்ற போது தோழர் க. தணிகாசலம் தலைமையுரை ஆற்றுவதையும் கிழக்கு லண்டன் பல்கலைக் கழக சமூகவியல் மானிடவியல் ஆய்வாளர் பரஞ்சோதி தங்கேஸ் அவர்கள் “முரண்பாடு புலப்பெயர்வு சாதி உருமாற்றம்”என்ற தலைப்பில் நினைவுச்சொற்பொழிவு ஆற்றுவதையும் நிகழ்வில் கருத்துரைப்போரையும் பார்வையாளர்களையும் படங்களில் காணலாம்.

















Saturday, December 5, 2015

தோழர் கே.ஏ.சுப்பிரமணியத்தின் 26 ம் ‌ஆண்டு நினைவு நிகழ்வில்.........

தோழர் கே.ஏ.சுப்பிரமணியத்தின் 26 ம் ‌ஆண்டு நினைவு நிகழ்வில் (2015.11.29)
“இனப்பிரச்சினைக்கான தீர்வில் இணக்க அரசியலும் எதிர்ப்பு அரசியலும்.” என்ற தலைப்பில் நினைவு சொற்பொழிவினை ஆற்றிய போது..


Saturday, November 28, 2015

கானுயர்ந்த மரங்களினால் மழைநீர் பொழிவதுபோல்
வானுயர்ந்த  கோபுரங்கள் வனப்புடனே மிளிர்வதுபோல்
நாணுயர்ந்த அம்புகள்போல் நாட்டிலுள்ள தோழமையால்
தானுணர்ந்த சேவையதால் தரணியிலே வாழுகிறீர்......

கார்த்திகையின் கைவிரிப்பு - காலனையும்
கட்டி அனணத்துக் கொண்டதா?
மானுட நேசத்தின் பசுந்தளிரை
பாதியில் பிரிந்து - கால் நூற்றாண்டு ஓடினவோ?
மணியம் என்றால் மனிதம் என்றும் ;
மடமை கொண்டோர் - கண்டஞ்சும்
மாவீரன் என்றும்
மார்தட்டி கொண்டோமே!
ஆதிக்க வெறியின் கயமையை- எதிர்த்து
அஞ்சாமையின் அர்தம் சொன்னவன் - நீ !
ஒடுக்குமுறையை துவம்சம் செய்தது - வரலாறே!
இரத்தம் தோய்ந்த  வெண்கொடிக்கு -  தான்தெரியும்
வெற்றிக்கு வலிகள் தேவை என்று!
உழைப்பாளியே தேசத்தின் உந்து சக்தி
பாட்டாளியே பார் ஆளவேண்டுமென
பால்ய வயதின் - பார்வையை
தேடி படித்த நூல்களும் தூண்ட
பொதுவுடமைக்குள் ஐக்கியமானாய்!
இரும்புக்கரம் கொண்டு
துப்பாக்கிகள் - கொடும் கொலை புரிய
நிதர்சனத்தின் நிஜம் புரியாது
மந்தையாக்ப்பட்ட மனித கூட்டத்தில்
மௌனம் காப்பரண் ஆகியது!
வரலாறுகள் திரிக்கப்பட்டாலும்
உன் வாழ்வின் நேர்மை
என்றோ வரலாறாகும்!
மானிட வாழ்வியலின் உன்னதற்கான
உன் போராட்டத்தில்
நானும் எறும்பென இறும்பூதுகின்றேன்
நீளும் நினைவுகளும்
நீடிக்கும் கண்ணீருமாய் காலம் ஓட
மரணத்தின் எல்லைகளில்
வாழும் எனக்கு- உன் வாழ்வு ஓர்
உந்துசக்தியே!

வள்ளியம்மை சுப்பிரமணியம் 27 November 2015

மக்களுக்கான செயலுறுதியும் நேர்மையும் கொண்ட அரசியல் வாதியாக வாழ்ந்தவர்.......

இலங்கை அரசியற்களம் ஏராளமான அரசியல்வாதிகளைக் கண்டுள்ளது. அதில் பெரும்பான்மையானோர் அதிகாரத்திற்கான ஆவலில் அரசியலுக்குள் நுழைந்தவர்கள். விதிவிலக்கானவர்களில் பலரை அதிகாரத்ததுக்கான ஆவல் விட்டுவைக்கவில்லை. இறுதிவரை தான் கொண்ட கொள்கைக்காக வாழ்ந்தவர்கள் ஒருசிலரே. அதிலும் அதிகாரத்துக்கெதிரான உழைக்கும் மக்களின் குரலாக ஒலித்த குரல்களுள் குறிப்பிடத்தக்கது தோழர் மணியம் என எல்லோராலும் அன்புடன் அழைக்கப்படுகின்ற கே.ஏ. சுப்பிரமணியத்தின் குரலாகும்.
தோழர் கே.ஏ.சுப்பிரமணியம் (இலங்கை கம்யூனிஸ்ட் கட்சியின் (இடது) இன்றைய புதிய ஜனநாயக மாக்சிச லெனினிசக் கட்சியின் ஆரம்ப பொதுச் செயலாளராவார். தோழர் என். சண்முகதாசனின் தலைமையிலிருந்த இலங்கை கம்யூனிஸ்ட் கட்சியிலிருந்து நீங்கி புதிய கட்சியைக் கட்டியதில் அவரின் பங்களிப்பு தனித்துவமானது. அவ் வகையில் அதன் தலைவராக அவரது முன்னெடுப்புகள் நினைவுகூரத்தக்கவை. இலங்கை மக்களின் விடுதலைக்குரிய பாதை புதிய ஜனநாயகப் புரட்சி மற்றும் சோஷலிஸ் புரட்சி என்ற இரண்டு புரட்சிகர காலகட்டங்களையும் கொண்டதெனவும் அவற்றை பாட்டாளி வர்க்க கட்சியே முன்னெடுக்க வேண்டுமெனவும் தீர்மானிக்கப்பட்டே புதிய கட்சி கட்டப்பட்டது. தேசிய இனங்களின் விடுதலை புதிய ஜனநாயகப் புரட்சியின் நிகழ்ச்சி நிரலாக முன்வைக்கப்பட்டபோது தேசிய இன ஒடுக்கலுக்கு எதிரான போராட்டமும் தேசிய இனப்பிரச்சினைக்குரிய குறைந்தபட்சத் தீர்வும் உடனடி தேசிய ஜனநாயக வேலைத்திட்டத்திக்குள் அடக்கப்பட வேண்டும் என்ற நிலைப்பாட்டை வலியுறுத்தியவர் கே.ஏ. சுப்பிரமணியம் ஆவார்.
தேசிய இன ஒடுக்கலுக்கு எதிரான இலங்கை தமிழ் மக்கள் மத்தியிலிருந்து முன்னெடுக்கப்பட்ட ஆயுதப் போராட்டம் புரட்சிகரப் போராட்டப் பார்வையில் புரட்சிகரமானதாக கொள்ள முடியாவிட்டாலும் அது இன ஒடுக்கலுக்கு எதிரான தேசிய ஜனநாயகப் போராட்டமே என்பது ஏற்றுக்கொள்ளப்பட்டது. அதன் அடிப்படையிலே தமிழ் மக்கள் மீதான அரசின் இராணுவ நடவடிக்கைகள் பொருளாதாரத்தடை என்பவற்றை எதிர்த்து வெகுஜன போராட்டங்களை முன்னெடுத்தது முதல் மனித உரிமைகளுக்கான வெகுஜன இயக்கம் போன்றவற்றுக்கு வழிகாட்டியது வரை அவரது பணி நீண்டது.
புரட்சிகரக் கட்சியைக் கட்டுவதிலும் வெகுஜனப் போராட்டங்களை முன்னெடுப்பதிலும் மாக்சிசம் லெனினிசம் மாஒசேதுங் சிந்தனையை நமது நாட்டின் சூழலுக்கு உரியவாறு பொருந்தச் செய்வதிலும் தேசிய இனப் பிரச்சினை பற்றிய புரிதலிலும் அவருக்கிருந்த அக்கறையும் செயற்றிறனும் மெச்சத்தக்கவை.
கம்யூனிசப் போராளியிடம் குடிகொண்டிருக்கக் கூடிய சிந்தனைத் தெளிவு, உறுதி, நிதானம், வீரம், எளிமையான வாழ்வு இறுதிவரை எதிரி வர்க்கத்திற்கு அடிபணியாமை போன்ற யாவற்றையும் தன்னுள்ளே கொண்டிருந்ததாலேயே அவரால் ஒரு தொழிலாளி வர்க்கக் கட்சியைக் கட்டி எழுப்பி வழிநடத்தக் கூடிய தலைமைப் பாத்திரத்தை வெற்றிகரமாகச் செயல்படுத்த முடிந்தது.
அவரது தலைமையின் இரு முக்கிய குறிகாட்டிகளை நினைவுபடுத்தல் தகும். முதலாவது தத்துவத்திலும் நடைமுறையாலும் உறுதியும் நிதானமும் மிக சரியானதோர் கம்யூனிஸ்ட் கட்சியை கட்டி எழுப்புதற்கான போராட்டத்தை முன்னனெடுத்தமை. இலங்கையின் இடதுசாரி இயக்க வரலாற்றில் ரொஸ்கியிசம் செலுத்தி வந்த பாதிப்புகளின் மத்தியில் மேற்குறித்த போராட்டம் மிகக் கடுமையானதாகவே இன்றுவரை இருந்துவருகின்றது. ரொஸ்கிசத்தின் பாதிப்புடன் பாராளுமன்ற சந்தர்ப்பவாதம் இழைத்த தவறுகள் நமது தேசத்தின் பிரத்தியேக நிலமைகளுக்கேற்ற ஒரு பாட்டாளி வர்க்க கட்சியை கட்டி வளர்க்கும் சூழலைப் பின்தள்ளியது. இருந்த போதிலும் சரியானதோர் கட்சியை கூட்டி எழுப்பும் பணியில் கே.ஏ. சுப்பிரமணியம் இறுதிவரை சளைக்காது போராடி அதற்கான அடித்தளத்தை வெற்றிகரமாக இட்டு சென்றார்.
இரண்டாவது, ஒரு சரியான கட்சியைக் கட்டி எழுப்பி விட்டுத்தான் வெகுஜனப் போராட்டங்களை முன்னெடுக்க வேண்டும் என்ற நிலையில் இருக்காது கட்சியை கட்டி எழுப்பும் அதேவேளை புரட்சிகர வெகுஜனப் போராட்டங்களே அடக்கி ஒடுக்கப்பட்ட மக்களின் பிரச்சினைகளை மையமாக வைத்து முன்னெடுப்பதில் மிக முனைப்புடன் செயல்பட்டவர்.
இப்பின்னணியில் தோழர் கே.ஏ. சுப்பிரமணியத்தின் வரலாற்றுப் பாத்திரத்தை அக்கால நிகழ்வுகளுடன் ஒப்புநோக்கின் அதன் பெறுமதி விளங்கும். இலங்கை கம்யூனிஸ்ட் கட்சியின் வரலாற்றிலும் பொதுப்பட இலங்கை இடதுசாரி இயக்க வரலாற்றிலும் ஐக்கியமும் போராட்டமும் பற்றிய பல பாடங்களை நாம் கற்கலாம். 1953ல் ஹர்த்தால் போராட்டத்தின் வெற்றி போராட்ட ஐக்கியத்தின் வெற்றி அந்த வெற்றியின் தொடர்ச் சியாகப் பாட்டாளிவர்க்கத் தலைமையில் பரந்துபட்ட ஒரு ஐக்கியம் கட்டியெழுப்பப்படவில்லை. அதற்காக இலங்கையின் இடதுசாரி இயக்கம் கொடுத்த விலை அதிகம்.
1963ல் 21 கோரிக்கைகள் மீது கட்டியெழுப்பப்பட்ட தொழிளாளர் ஐக்கியத்தைப் பதவி ஆசை காட்டி ஸ்ரீலங்கா சுதந்திரக் கட்சியால் குலைக்க முடிந்ததென்றால் அது நமது இடதுசாரி இயக்கத் தலைமைகளின் வருந்தத்தக்க நிலைமைக்கு ஒரு சான்றே ஒழிய பாராளுமண்ற வேறல்ல வலது சந்தர்ப்பவாதம் இவ்வாறு பாட்டாளி வர்க்கப் போட்டத்தைக் காட்டிக் கொடுத்தது என்றால், மறுபுறம்,இதை வைத்து கொண்டு வரட்டுத்தனமான மாக்சியத்தை நடைமுறைபடுத்தியதன் விளைவாக, 1963 முதல் 1968 வரை வலிமை பெற்று வந்த மாக்சிய லெனினிசக் கம்யூனிஸ்ட் கட்சி வலுவிழந்தது.இதற்குச் சிங்களப் பேரினவாதத்தின் எழுச்சியும் அதன் எதிர் வினையாகக் குறுகிய தமிழ்த் தேசியவாத அரசியலின் வளர்ச்சியும் அளித்த பங்கு பெரியது.
ஜே.வி.பி. போன்ற ஒரு இயக்கத்தால் சிங்களப் பேரினவாத அரசியலை மாக்ஸிய மயக்கத் தோற்றத்துடன் முன்னெடுக்க இயலுமானதற்கு மாக்ஸியலெனினியத் தலைமையின் போதாமையின் பங்கை நாம் அலட்சியம்செய்ய இயலாது. கடந்த 80 ஆண்டுகால இடதுசாரி இயக்க வரலாற்றில் கற்ற முக்கியமான பாடமாகவே ஜக்கியமும் போராட்டமும் கொண்ட போராட்ட ஜக்கியக் கொள்கையை நாம் அடையாளங் காணலாம். கொள்கை அளவிலும் நடைமுறையிலும் இதைக் குழப்பமின்றிக் கடைப்பிடித்த ஒரு மாக்ஸிய லெனினியவாதி என்ற வகையில் கே. ஏ. சுப்பிரமணியம் முதன்மையானவர். இதனாலேயே இடதுசாரி இயக்கம் இலங்கையில் கண்ட மோசமான பின்னடைவுகளுக்குப் பின்னும் ஒரு மாக்சிய லெனினிசக் கட்சியைக் கட்டியெழுப்ப இயலும் என்பதை அவர் செய்து காட்டினார்.
இலங்கை இடதுசரி இயக்க வரலாற்றின் முக்கியமான மைல்க்கல் சாதியத்துக்கெதிரான போராட்டமாகும். இதை முன்னின்று தலைமையேற்று வெற்றிகரமான நடாத்திய பெருமை கே.ஏ. சுப்பிரமணியத்தை சாரும். புரட்சிகரக் வெகுஜனப் போராட்டங்கள் நடைமுறையினின்று தான் உருவாகின்றன. அவ்வகையிலேயே 1966 ஒக்ரோபர் 21 எழுச்சியின் ஊடே ‘தீண்டாமை ஒழிப்பு வெகுஜன இயக்கம்’ தோற்றம் பெற்றது. சாதியத்துக்கு எதிரான போராட்டத்தின் போது ஒரு புறம் காட்டிக்கொடுப்பும் எதிரியுடனான சமரசமும் சிலரால் முன்னெடுக்கப்பட்டது. மறுபுறம் சாதியத்திற்கு எதிரான போரட்டத்தைச் சாதிகளிடையிலான போராட்டமாக்கும் ஒருவகை யான போலி இடது தீவிரவாதமும் போராட்டத்தை தனிமைப்படுத்த முற்பட்டன. இவற்றுக்கிடையே. இவற்றை முன் வைத்த சக்திகளுடனுங் கூடப் போராட்டமும் ஐக்கியமும் என்ற பாதையில் இணைந்து செயற்பட்டதன் மூலமே சாதி அடிப்படையில் ஒடுக்கப்பட்ட மக்களுக்கான போராட்டம் சாதிய எல்லையை மீறி ஒரு வர்க்கப ;பரிமாணத்தையும் ஒரு பரந்து பட்ட வெகுஜனப் போராட்டப் பண்பையும் பெறலாம் என தனது செயல் வடிவத்தின் மூலம் கே.ஏ. சுப்பிரமணியம் நிரூபித்தார்.
கே.ஏ. சுப்பிரமணியத்திடம் இருந்து இன்னொரு முக்கிய பண்பு நட்புச் சக்திகளை இனங்கண்டு அவர்களையும் அரவணைத்துப் போகும் இயல்பு. மனிதர்கள் என்போரிடம் ஆற்றல்களும் திறமைகளும் நிறையவே உண்டு. ஆனால் அவை ஒரே மாதிரியானவை அல்ல. வௌ;வேறு வகைபட்ட திறமைகள் ஒவ்வொன்றும் அவற்றுக்குரிய தளங்களில் ஊக்குவிக்கப்பட்டு வெளிக் கொணரப்படும் போது அவை சமூகத்தின் முன் னோக்கிய வளர்ச்சிக்கு உதவுகின்றன.
அவ்வாறே ஒரு கம்யூனிஸ்ட் இயக்கத்தில் கட்சியின் வளர்ச்சிக்கும் அதன் தலைமையிலான போராட்டங்களுக்கும் மனிதர்களின் திறமைகள் பயன்படுத்தப்படுதல் வேண்டும் அதில் கட்சிக்கு உள்ளே இருப்பவர்களது திறமை மட்டுமன்றி கட்சிக்கு வெளியே உள்ளவர்களின் திறமைகளை பெற்றுப் பயனடைவது ஒரு கட்சி தலைமைக்கு முக்கிய பொறுப்பாகும்.
அந்த வகையில் கே.ஏ. சுப்பிரமணியம் பலதரப்பட்டவர்களின் திறமைகளை அடையாளம் கண்டு அவற்றைக் கட்சிக்கும் அதன் போராட்டங்களுக்கும் நன்கு பயன்படுத்தினர். கட்சியில் உள்ளவர்கள், கட்சிக்கான நண்பர்கள், கட்சிக்கு அப்பால் உள்ள ஆனால் கட்சி விரோதமற்றவர்கள் என அவர்களை மூன்றுபிரிவினராக அடையாளப்படுத்தி தனது வேலை முறையை முன்னெடுத்தவர். இந்த மூன்று தரப்பினரையும் அவர்களுக்கு உள்ள திறமைகள் ஆற்றல்கள் என்பவற்றை ஆராய்ந்து பொறுமையாக அவர்களுடன் பழகி அவர்களது திறமைகளை ஊக்குவித்தவர். பின்பு கட்சி அத்தகையவர்களிடமிருந்து பெறக்கூடிய வேலைகளை ஒழுங்குப்படுத்தி பெற்றுக் கொள்ளும் திறமை அவரிடமிருந்தது.
இவ்வாறு அவர் உருவாக்கிய உறவுகளில் பேராசிரியர் க. கைலாசபதியுடனான உறவு முக்கியமானது. பேராசிரியர் கைலாசபதியுடன் ஆரம்ப காலம் தொட்டு பிணைப்பு இருந்து வந்த அதேவேளை கட்சியின் அரசியல் இதழ்களில் கைலாசபதியின் கட்டுரைகள் தொடர்ச்சியாக வந்தமைக்கு கே.ஏ. சுப்பிரமணியத்தின் அணுகுமுறை ஒரு முக்கிய காரணம்.
கட்சியின் நிலைப்பாட்டுடன் முழுமையாக உடன்படாதவர்கள் பலர் நட்புச்சக்திகளாக இருக்கின்ற நிலையில் அவர்களுடன் நெருங்கிப் பழகி பயனுள்ள விடயங்களை பெறும் இயல்புக்கு ஏ.ஜே. கனகரட்ணாவுடன் கே.ஏ. சுப்பிரமணியத்துக்கிருந்த நட்பைக் குறிப்பிடலாம்.
கே.ஏ. சுப்பிரமணியம் பெயரளவிலான ஒரு கம்யூனிஸ்டாகவோ,இன்றைய சமூகத்தின் கொடுரங்களுடன் இணங்கிப் போய் தனது சொந்த வாழ்வை மேம்படுத்தியோ, அன்றி கம்யூனிச மேற்கோள்களை வரட்டுத்தனமாக உச்சாடனம் செய்து கொண்டோ வாழ்ந்து வந்த ஒருவரல்ல.
அதிகார பீடத்தில் அமர்ந்தவர்களுக்கும் ஆயுத பலத்தை மாத்திரமே நம்பியிருப்பவர்களுக்கும் மாறான அரசியல் நிலைப்பாட்டை மேற்கொள்ளும் ஒருவருக்கு அசாதாரண துணிச்சல் அவசியமாகும். சிறுபான்மையோரின் நலன் காக்கும் நோக்குடன், பெரும்பான்மையோரின் இனவிரோத நிலைகளை மறுக்கும் அதே சமயத்தில் குறுகிய இனவுணர்ச்சி அலைகளுடன் அள்ளுப்பட்டுப் போகாமல் இருப்பதற்கு வெறும் மனவுறுதி மட்டும் போதாது. அதற்கும் மேலான செயலுறுதியும் தளராத நம்பிக்கையும் நோக்கும் அவசியம். இவை அனைத்தையும் ஒருங்கே கொண்டமைந்த போராளியே தோழர் கே.ஏ. சுப்பிரமணியம் ஆவார். தனது சொல்லாலும் செயலாலும் புரட்சிகர வாழ்வை வாழ்ந்து வழி காட்டலையும் வழங்கிச் சென்ற ஒரு உயர்வான கம்யூனிஸ்ட் போராளியாக வாழ்ந்து மறைந்தவர் என்பது மிகையல்ல.
தமிழ்மகன் ( Thanks to Thinakkural and Inioru)

Monday, November 23, 2015

தோழர் கே.ஏ. சுப்பிரமணியம்: 26வது நினைவு நிகழ்வு Comrade K. A. Subramaniam: 26th Anniversary Event

Comrade K. A. Subramaniam: 26th Anniversary Event

தோழர் கே.ஏ. சுப்பிரமணியம்: 26வது நினைவு நிகழ்வு
29.11.2015 ஞாயிற்றுக்கிழமை பி.ப.04 மணிக்கு 
தேசிய கலை இலக்கியப் பேரவையின் கைலாசபதி கேட்போர் கூடம் 
(121, ஹெம்டன் ஒழுங்கை, வெள்ளவத்தை)

கே.ஏ. சுப்பிரமணியம் நினைவுக் குழு

Comrade K.A. Subramaniam: 26th Anniversary Event

29.11.2015 Sunday at 04.00 pm
Venue:
National Arts Council of Literary's
Kailasapathy Auditorium 
(121, Hampden Lane, Wellawatte Colombo 06)

KA  Subramaniam Memorial Committee

Saturday, November 29, 2014

தோழர் சி.கா.செந்திவேல் எழுதிய "தோழர் மணியம் நினைவுகள்" நூல் வெளியீட்டு விழா



பொதுவுடைமை இயக்க புரட்சிகர முன்னோடிகளில் ஒருவரான கே.ஏ.சுப்பிரமணியத்தின் 25வது ஆண்டு நினைவுதினக் கூட்டம் கொழும்பு தமிழ்ச்சங்கத்தில் நடைபெற்றது. மு.மயூரன் தொகுத்தளிப்பதையும் முனைவர் சி.சிவசேகரம் சோ.தேவராஜா பேராசிரியர் ஜெயதேவ உயங்கொட சிவ.ராஜேந்திரன் உரையாற்றுவதையும் தோழர் மணியம் நினைவுகள் நூல் எழுதிய சி.கா.செந்திவேல் அதன் முதற்பிரதியை திருமதி வள்ளியம்மை சுப்பிரமணியத்திற்கு வழங்குவதையும் கூட்டத்தில் கலந்துகொண்டேரில் ஒரு பகுதியையும் காணலாம்.


Monday, November 24, 2014

தோழர் கே.ஏ. சுப்பிரமணியம்: 25வது நினைவு நிகழ்வு Comrade K. A. Subramaniam: 25th Anniversary Event

தோழர் கே.ஏ. சுப்பிரமணியம்: 25வது நினைவு நிகழ்வு
29.11.2014 சனிக்கிழமை பி.ப.04 மணிக்கு 
கொழும்பு தமிழ்ச் சங்கம்
(57 ஆவது ஒழுங்கை, சங்கம் ஒழுங்கை , வெள்ளவத்தை)
தலைமை: பேராசிரியர் சி. சிவசேகரம்
அறிமுகவுரை: சோ. தேவராஜா
கே.ஏ. சுப்பிரமணியம் நினைவுக் குழு

Comrade K.A. Subramaniam: 25th Anniversary Event

29.11.2013 Saturday at 04 pm
Venue:
Colombo Tamil Sangam Auditorium 
(57th  Lane, Wellawatte Colombo 06)
Head: Professor S. Sivasegaram
Introduction: S. Thevarajah
Memorial Lecture:

Prof. Jayadeva Uyangoda

 Vote of Thanks: R.Ranjan

KA  Subramaniam Memorial Committee


பொதுவுடமை இயக்கத்தின் புரட்சிகர முன்னோடி
தோழர் கே.ஏ.சுப்பிரமணியத்தின் 25வது ஆண்டு நினைவுக் கூட்டம்
கொழும்பு தமிழ்ச் சங்க மண்டபம்
29.11.2014 சனிக்கிழமை பி.ப. 4.00 மணி
தலைமையுரை
முனைவர் சி. சிவசேகரம்
வரவேற்புரை
சட்டத்தரணி சோ. தேவராஜா
நூல் வெளியீடு
“தோழர் மணியம் நினைவுகள்"
(சி.கா. செந்திவேல்)
முதற் பிரதி பெறுநர்: திருமதி வள்ளியம்மை சுப்பிரமணியம்
நூல் ஆய்வுரை
சிவ. இராஜேந்திரன்
பீடாதிபதி, மட்டக்களப்பு தேசிய கல்வியற் கல்லூரி
ஏற்புரை
சி.கா. செந்திவேல்
நினைவுப் பேருரை
“இணக்கத்தின் இணங்க இயலாமை:
போரின் பின்னான இணக்கம்: தனிமைகள் கடந்து சிந்தித்தல்"
பேராசிரியர் ஜயதேவ உயன்கொட
நன்றியுரை
தோழர் கே.ஏ. சுப்பிரமணியம் நினைவுக் குழு

Wednesday, October 29, 2014

தோழர் கே ஏ சுப்பிரமணியம் உரையாடிய சில பகுதிகளின் காணொளிகள் 1982-1989



Message to Dispora by K.A.Subramaniam in 1982 Length:2 Minutes

'சத்தியமனையில் '1982அம்  ஆண்டு , மே -ஜூன் காலப் பகுதியில் இத்தாலியில் இருந்த தோழர் தேவகுமாரனுக்கான காணொளி உரையாடலின் போது தோழர் கே ஏ சுப்பிரமணியம் உரையாடிய சில  பகுதிகளின் காணொளி உரைவடிவம் .அவருடன் தோழர்கள் சோ .தேவராஜா , சி.கா.செந்தில்வேல் ஆகியோர் உடன் இருந்தனர்.

"இலங்கையிலிருந்து போயிருக்ககூடிய தமிழ்த் தோழர்கள் ,அங்கிருக்கக்கூடிய சிங்களத் தோழர்கள் ஒன்றுபட்டு தேசத்தின் ஐக்கியத்தையும்,,சுதந்திரத்தையும் பாதுகாப்பதற்க்காக கூடப் பாடுபடவேண்டும் .மற்றது இங்கே உண்மையிலேயே பொருளாதார நெருக்கடி காரணமாகத்தான் உழைப்பு பிரச்சனை சம்பந்தமாகத்தான் அவர்கள் போகவேண்டி வந்தது.

 சரி அவை அந்த நிலைமையை எடுத்திருந்தாலும் கூட, எதிர்காலத்திலையும் அதை நாட்டின்ரை , தேவைக்கும் நன்மைக்கும் நாட்டின் சுதந்திரத்திற்கும் அவை உழைப்பினம் என்று  நம்பிக்கை .ஆனால் அவை செய்வினம் என்று தான் நம்புகின்றேன் 

குமார் இப்போ இரண்டாவது முறை வந்து போய் இருக்கிறார். அவருக்கு இத்தாலி அனுபவங்கள் கூட இருக்கும் . இத்தாலி நாட்டிலை சரியான மாற்றங்கள் எற்பட்டு இருக்குது. அவையின்ரை  பொருளாதரா ,சமூக அபிவிருத்திகள் கூட நடந்திருக்கிறது. இன்னும் இங்கிருந்து போனவை இத்தாலி நாட்டு பொருளாதரத்தை கட்டி எழுப்புவதற்கும் , அதன்  சுதந்திரத்தை  பாதுகாப்பதறக்கும் அங்கே  அவை பாடுபடும் அதே வேளை , எங்கடை நாட்டு சுதந்திரத்தை பாதுகாக்கின்றதற்கும்  ,அதின்றை  பொருளாதரத்தை கட்டி எழுப்புவதிலையும்  அவை கூடுதல் பங்கு வகிக்கவேண்டும் . அதற்க்கு அவை அங்கேயுள்ள இலங்கை இளைஞர்களை அணிதிரட்டுவது  அவைக்கு கல்வியறிவைக் கொடுக்கிறது , நாட்டு நிலைமைகளை விளங்கப்படுத்துவதன் மூலம் அவை கூடிய சேவையை ஆற்ற முடியும் !"

Wedding Greetings by K.A.Subramaniam in 1984 Length:2 Minutes


 "திரு. சோமசுந்தரம்  தேவகுமார் -  திருமதி வள்ளிநாயகி ஆகியோரின் திருமண வைபவம் இங்கு நடைபெறுகிறது . இவர்களுடைய வாழ்க்கையில் , இவர்கள் இரண்டாம் கட்டத்தை ஆரம்பிக்கிறார்கள் என்பது அர்த்தம் . வாழ்க்கை ஒரு போராட்டம். இவர்களுடைய வாழ்க்கையில் முதலாவது கட்டம் தமது பாடசாலைக்  கல்வி- சமூக ஒடுக்குமுறைக்கெதிரான  போராட்டம், வறுமைக்கு எதிரான போராட்டம் என இவர்கள் இருவரும் தனித் தனியாக கடந்து வந்திருக்கிறார்கள். இன்று அவர்கள் வாழ்க்கைத் துணை என்ற ஒரு நிலைப்பாட்டில் இன்று தமது வாழ்க்கையை ஒருமுகப்படுத்தி முன்னெடுக்க முன்வருகிறார்கள் .ஒருவருக்கு ஒருவர் துணையாக , ஒருவரை ஒருவர் சார்ந்து ,தமது வாழ்க்கைப் போராட்டத்தை முன்னெடுக்கும் இவ்வேளை ,இவ்வுலகம் முழுமையிலுமுள்ள நிலைமைகளைப் பார்த்தால்,உலகத்திலுள்ள நாடுகள், தேசங்கள் சுதந்திரத்தை காப்பற்றுவதற்க்கும் , நாடுகள் விடுதலையை அடைவதற்கும் மக்கள் புரட்சியை வேண்டியும் போராடுகிறார்கள். அவர்களது போராட்டத்துடன் உங்கள் போராட்டம் இணையட்டும் உலக சமாதானந்த்திற்க்கும் ,மனித குல நல்வாழ்விற்குமான பெரும் போராட்டத்தில் உங்கள் பங்கும் இணையட்டும் ! என வாழ்த்தி மங்களகரமான இந்நாளில் ,மணமக்கள் சகல வாழ்வையும்  பெற்று ,பெரு வாழ்வு வாழ வாழ்த்துகிறேன் !!! "-கே ஏ சுப்பிரமணியம் 07-02-1984

May Day Rally Speech in 1986 Length:2 Minutes




1986
ம் ஆண்டு நல்லூரில் இருந்து ஆரம்பமாகி ----- திருநெல்வேலியில் நடைபெற்ற ஊர்வலமும் கூட்டமும் .யாழ்  நகரில் மிகுந்த பதட்ட சூழ்நிலையில் வேறு  எந்த கூட்டமோ, ஊர்வலமோ நடைபெறாத நிலையில் நடந்த ஒரே ஊர்வலத்தினை  இடது கம்யூனிஸ்ட் கட்சி   மிக எழுர்ச்சியுடன் நடாத்தியது. அவ் ஊர்வலத்திற்கும் ,கூட்டத்திற்கும்  தோழர் கே. ஏ. சுப்பிரமணியம் அவர்கள் தலைமைதாங்கி நடத்தினார் .அக்  கூட்டப் பேச்சு இது...............

"ஜெயவர்த்தனாவும் அவருடைய எடுபிடிகளும் சமாதனம் வேண்டும் வீதியில்  அமைதி வேண்டும் , நாட்டில் அமைதி வேண்டும் என்ரெல்லாம் தினசரி பத்திரிகைகளில் குரல் கொடுப்பதை நாம் அறிவோம். ஆனால் இந்த நாட்டு மக்களுடைய ஜனநாயக உரிமைகள் மறுக்கப் படும்போது ,நீதி மறுக்கப்படும்போது சுதந்திரம் மறுக்கப்படும்போது நிச்சயமாக பலாத்காரம் இருக்கத்தான் செய்யும் . பலவந்தமாக தங்களது உரிமைகளை மீட்டெடுக்க வேண்டிய பொறுப்பு மக்களுக்கு உள்ளது. ஆகவே நீதியைப் பற்றிப் பெருமைப்படும் அல்லது நீதி வேண்டும் என்கின்ற ஜெயவர்த்தனாவோ, அல்லது அமைதி வேண்டும் என்கிற ஜெயவர்த்தனவோ இந்த நாட்டில் நீதியையும் ,சுதந்திரத்தையும் முன்னர் முதலாக  வழங்கி இருக்க வேண்டும்.குறிப்பாக தமிழ் மக்களுடைய உரிமைகள் வழங்கப்படவேண்டும் 
அப்படியான ஒரு சூழ்நிலையில் தான் நாட்டில் அமைதியைக் காண முடியும். ஜெயவர்த்தனா பேச்சுவார்த்தைக்கு முன்வருவதாகக் கூறி ,இவவளவு காலத்தையும் இழுத்தடித்து இருக்கிறார்..இன்னும் தான் அவர்கள் அரசியல் ரீதியாக தீர்வு காண்பதற்கு முன்வந்தால் நாங்கள் அதனை ஆதரிக்கிறோம்  தமிழ் மக்களுடைய பிரதேசங்கள் ,வடக்குக் கிழக்கு பிரதேசங்கள் அவர்களுடைய தாயகமாக அங்கீகரிக்கப்படவேண்டும். அந்த அடிப்படையில்  பிரதேச சுயாட்சி வழங்கப்படவேண்டும். அதுதான் தமிழர்களுடைய  கோரிக்கைகள் ஒரு பகுதியாவது  அடைவதற்கு அது ஒரு முன்தேவையாக அமையும்."
அங்கு அலை என  திரண்ட மக்கள் சுடு வெய்யிலையும் பொருட்படுத்தாது கோசங்களை எழுப்பியவண்ணம் தங்கள் உணர்வை வெளிப்படுத்தினர்..அச் சுலோகங்களில் சில இங்கு .............

  • உலகத் தொழிலாளர்களே ஒன்று சேருங்கள் 
  • பாட்டாளி வர்க்கம் பாராளும் வர்க்கம் 
  • புத்தர் சொன்னார் அகிம்சை என்று 
  • ஜே ஆர் சொன்னார் யுத்தம் என்று 
  • நாடு எங்கே போகிறது?
  • யார் யார் பயங்கரவாதி?
  • ஜே ஆர் பயங்கரவாதி 
  • அத்துலத்முதலி பயங்கரவாதி  
  • ரீகன் பயங்கரவாதி 
 
Speech During Presidential Election 1988
Length:2 Minutes
 



"
தமிழ் மக்களின் பிரச்சனை எது? எப்படி தீர்வு காணவேண்டும் என்று போராடும் அனைத்து சக்திகளுடனும் ஒன்றுபட்டு நிற்கிறோமே தவிர சொந்த அபிலாசைகளுக்காகவோ ,வேறு எதற்காவோ நாம்  இங்கு நிற்கவில்லை.. சிறிமாவோ பண்டரநாயக்கா இந்த ஒப்பந்தத்தை , இந்திய இராணுவத்தை அகற்ற முயல்வார் என்று நம்புகிறோம் "- கே ஏ சுப்பிரமணியம் 1988 இல் யாழ் / பண்டத்தெருப்பு இந்துக்கல்லூரி மைதானம்

 


May Day Rally Speech in 1989 Length:2 Minutes
 
"பிரேமதாசா அரசு, விடுதலைப் புலிகளுடன் பேச்சுவார்த்தைக்கு வந்திருக்கிறதென்றால் ,நாம் ஏற்கனவே கூறிய உண்மை "உண்மைதான்' என்பதை அதன்  விளங்கிக் கொள்ள முடியும் .நாம் பேச்சுவார்த்தையை ஏற்றுக்கொள்கிறோம் .அதேநேரம் அது பூச்சண்டியாக அமையக்கூடும் .அது உண்மையாக இரு இனங்களும் ,எமது நாட்டில்  சுதந்திரத்துடனும்,  இறையான்மையுடனும் வாழக்கூடியதாd ஒற்றுமையை ஏற்படுத்துவதற்கும்,பாதுகாப்பதற்கும்  ஏற்ற வழி அமைக்கப்படவேண்டும். அதற்க்கு முன்பாகவே, வெலியோயா தனி மாவட்டமாக அமைப்பதைக் கைவிடவேண்டும்.அத்தோடு கிழக்கு மாகாணத்தில் சர்வஜன வாக்கெடுப்பை தற்காலிகமாக நிறுத்தி ,ஏன் முற்றாகவே கைவிடவேண்டும் என்று இலங்கை கம்யூனிஸ்ட் கட்சி இடது வலியுறுத்தி நிற்கிறது . இதன் மூலம் தான் பேச்சுவார்த்தைக்கு போகக் கூடிய ஸ்தாபனங்களுக்கும் ,மக்களுக்கும் நம்பிக்கையைத் தரும்.பரஸ்பரம் விடுக்கொடுத்து பேச்சுவார்த்தையை   நடத்தக்கூடிய சூழ்நிலையும் உருவாகமுடியும்இதனைவிடுத்து இலங்கை அரசின் விருப்பத்தின் பேரிலோ, இந்திய அரசின் பேரிலோ , ஒருதலைப்பட்ச முடிவுகளின் பேரிலோ ஏற்படுத்தப்படக்கூடிய தீர்மானங்களும் , முடிவுகளும் , ஆயுதங்களும் எமது தேசத்தில் அமைதியை நிலை நிறுத்த முடியாது . இதுவே எமது நிலைப்பாடாகும் ".-கே ஏ சுப்பிரமணியம் 1989


 
 
 
 
 
நாம்
இந்தியாவின்
தலையீட்டை  ஆரம்பம் தொட்டு எதிர்த்து வந்திருக்கின்றோம். இலங்கை அரசு செய்துகொண்ட ஒப்பந்தம் என்ற காரணத்தினால் , சில  விட்டுக் கொடுப்பை இலங்கை மக்கள் செய்யவேண்டும். அந்த விட்டுக்கொடுப்பு, இந்தியாவையும் இணைத்த முத்தரப்புப் பேச்சுவார்த்தை.“


" இந்தப் பேச்சுவார்த்தை இலங்கை அரசு, இந்திய அரசு , ஏனைய விடுதலை அமைப்புகள் மூன்றும் ஒன்றுகதைத்து ஒரு முடிவுக்கு வரக்கூடிய வெற்றிகாணக் கூடிய முயற்ச்சிக்கு ஒத்துழைக்க வேண்டும், அதைவிட்டு ஒன்றிற்கொன்று கழுத்தறுப்பு வேலைகளை செய்வது, எமது நாட்டிற்கும், மக்களுக்கும் பெரிய ஆபத்தை விளைவிக்கும். இந்தியா பற்றிய எமது நிலை ஏற்கனவே நீங்கள் அறிந்ததே , இருந்தும் சிலதை திரும்ப சொல்ல வேண்டும் , ஆரம்பம் தொட்டு இலங்கை கம்யூனிஸ்ட் கட்சி பீட்டர் கெனமன், விக்கிரமசிங்க போன்றோர் தலைமையிலும் சரி, பின்னர் கருத்துவேறுபாட்டு பிரிந்த பின்னரும் சரி 'அந்திய தலையீடு ' பற்றி எச்சரித்தே வந்திருக்கின்றது . இதனை இலங்கையிலுள்ள அரசியல் கட்சிகள், விடுதலை இயக்கங்கள் கவனத்தில் கொள்ள தவறிவிட்டன. 1983 இனக் கலவரத்தை சாதகமாக்கி இந்திய தன்னுடைய விஸ்தரிப்பை ஆரம்பித்தது. அதனை இலங்கை அரசும் ஆதரிப்பது போன்றே நடந்துகொண்டது. ஒப்பந்தம்  உருவானது . இது பல வகையிலும் குழப்பமான ஒன்றாகவே உள்ளது. சில விஷயங்கள் தமிழ் மக்களின் விடுதலைக்கும் , எதிர்காலத்திற்கும் உதவக்கூடிய சில அம்சங்கள் உள்ளன. ஆனால் ஒப்பந்தத்தில் காணப்படும் பெரும்பான்மையான விடயங்கள் தமிழ் மக்களுக்கு மட்டுமல்ல சகல இலங்கை மக்களையும் பாதிக்கக் கூடியதே . எதிர்க்க வேண்டும் அல்லது மாற்றியமைக்க வேண்டும்.”
  - கே ஏ சுப்பிரமணியம் மருத்துவமனையில்கடும்சுகவீனமுற்றுஇருந்துவெளிவந்து ,யாழ் / ஸ்டான்லிவீதியில் 1989-05-01  மேதினத்திலன்று...............

தோழர் கே ஏ சுப்பிரமணியம் 1989 விடைபெறுகிறேன் K.A.Subramaniam Commemoration Volume

தோழர் கே ஏ சுப்பிரமணியம் 1989 விடைபெறுகிறேன்  K.A.Subramaniam Commemoration Volume
Please click on the photo to download the FULL VOLUME in PDF